«Սենշյան Փաշինյան». Բացվեց հայ-չինական դպրոցը (տեսանյութ)
Հայ-չինական բարեկամությունը համալրվեց եւս մեկ կապող օղակով: Երեւանում այսօր պաշտոնապես բացվեց հայ-չինական բարեկամության դպրոցը, որի կառուցմանը աջակցել է Չինաստանի կառավարությունը:
Դպրոց-վարժարանը գործելու է նախկին 103 դպրոցի հիմքի վրա, այստեղ հայերեն լեզվով դասավանդվելու են հանրակրթական դպրոցի բոլոր ծրագրերը, մեկ տարբերությամբ, որ չինարեն լեզուն դպրոցում կլինի առաջնահերթությունների շարքում:
Հայ-չինական դպրոց կարող է ընդունվել 5-12 րդ դասարանի յուրաքանչյուրը աշակերտ թե՛ Երեւանից, թե՛ Հայաստանի մարզերից: Հատուկ ուսուցիչներն էլ կժամանեն Չինաստանից: Վերջիններիս ու մարզերի աշակերտների համար դպրոցին կից կառուցվել է հատուկ հանրակացարանային մասնաշենք: Դպրոցում գործում է 27 դասարան, յուրաքանչյուրում 15 աշակերտ: Դպրոցը նախատեսված է 405 աշակերտի համար:
Այս կրթական նախագծի ընդհանուր արժեքը ավելի քան 12 մլն դոլար է, որն իր մեջ ներառել է դպրոցի ամբողջական շինարարական աշխատանքները եւ կահավորումը: Գործում են սպորտդահլիճ, լաբորատորիա, գրադարան, համակարգիչներով լսարաններ:
Հայ-չինական բարեկամության դպրոց-հիմնադրամի տնօրենի ժամանակավոր պաշտոնակատար Սպարտակ Վարդանյանը «Ա1+»-ի հետ զրույցում ասաց, որ հայ- չինական կրթական ոլորտում այս համագործակցությունը կնպաստի չինական ներդրումային հնարավորությունները Հայաստանում ավելացնելուն:
«Դպրոցում հիմա սովորում են 103 ավագ դպրոցի աշակերտները, նույն են նաեւ ուսուցիչները: Այս դպրոցը միանշանակ տարբերվելու է նախկին կրթական հաստատությունից, քանի որ նոր պայմանները թելադրում են նոր պահանջներ: Չինարեն լեզվի խորացված ուսումնասիրությունը կլինի բոլոր դասարաններում. 5-9 –րդում՝ շաբաթական 3 ժամ, իսկ ավելի ավագում՝ 4 ժամ: Չինարեն լեզվի դասագրքերը նվիրել է չինական կողմը, հիմնականում համագործակցում ենք Կոնֆուցիոսի ինստիտուտի հետ»,-ասաց նա:
Նա նաեւ տեղեկացրեց, որ դպրոցը կարող է մատուցել լրացուցիչ ծառայություններ՝ չինարենը սովորել ցանկացողների համար:
Նկատենք, որ Հայ-չինական դպրոցի ընդունելության ժամանակ հաշվի է առնվել աշակերտի ուսումնական նախորդ տարվա առաջադիմության արդյունքները:
«Ընդունելության սկզբունքը հաշվարկվել է միջին թվաբանականով, քանի որ կարծում եմ, որ արդար է հենց այդ տարբերակովը: Ճիշտ մոտեցում է, ճիշտ հաշվարկված կատարվել է ընդունելություն և կարծում եմ վաղը հայտնի կդառնան արդյունքները. Ընդունելությունը ազատ է եղել, 330 նոր աշակերտ է ընդունվել, 70 աշակերտ էլ ավագ դպրոցը շարունակում է 103 դպրոցի բազայի վրա»,-«Ա1+»-ին ասաց դպրոցի փոխտնօրեն Լյուդմիլա Ապրեսյանը:
Դպրոցի ավարտական դասարանների աշակերտները, թեև մեկ տարի են ուսումնասիրելու չինարեն լեզուն, բայց համոզված են, որ այդ ժամանակահատվածն էլ բավական է:
«Այս դպրոցում սովորելը արդեն իսկ մեծ հաջողություն է, քանի որ չինարենի իմացությունը հաջողությունների համար նոր դռներ կբացի»,-ասաց Նունե Մխիթարյանը:
«Ես դառնալու եմ պարուսույց ու շրջագայելու եմ Չինաստանով: Համոզված եմ, որ կյուրացնեմ եւ կսովորեմ այդ լեզուն հնարավորինս արագ»,-ասաց մեկ այլ աշակերտուհի Նելլի Հարությունյանը:
Հայ-չինական դպրոցի բացման արարողության մասնակցելու համար ժամանել էր նաեւ ՀՀ վարչապետ Նիկոլ Փաշինյանը եւ ՀՀ-ում Չինաստանի արտակարգ եւ լիազոր դեսպան Թիան Էրլուն:
Փաշինյանը հետաքրքրվեց՝ հայերը հեշտ են սովորում այդ լեզուն, թե ոչ: Դեսպանն էլ պատասխանեց.
«Հայկական լեզվական ընդունակությունների պարագայում դա բավականին հեշտ է; այսօր Հայաստանում չինարեն սովորողների թիվը մոտ 1000 է»:
Հետո հավելեց. շենքի դիմային մասը կառուցվել է հայկական օբսիդիանից:
«Հայաստանն ու Չինաստանն ունեն բազմաթիվ ընդհանուր հետարքրքություններ, որոնք ունեն նաև ռազմավարական նշանակություն. Նորակառույց այս դպրոցի բացումը պետք է խորհրդանշի մեր երկրների հարաբերության նոր, ավելի արդյունավետ, ավելի սերտ, ավելի բարեկամական էջի բացումը: Մեր հանրապետության փողոցներով երթևեկում են Չինաստանի դրոշներով ավտոբուսներ, շտապ օգնության կարիք ունեցող անձանց օգնության շտապում են Չինաստանի դրոշով շտապօգնության մեքենաներ, և հայ ժողովուրդը չափազանց բարձր է գնահատում այդ աջակցությունը», - իր ելույթում ասաց վարչապետ Նիկոլ Փաշինյանը:
Դեսպան Թիան Էրլուն նրան դիմելով Սենշյան Փաշինյան, հավելեց, որ ներկա հայ-չինական հարաբերությունները պահպանում են առողջ զարգացման միտումը, համագործակցում են բոլոր ոլորտներում ու դա ընդլայնվում է:
«Չնաշխարհիկ հայերեն բառը թարգմանվում է« չին աշխարհից», այսինքն` հրաշալի: Հուսով եմ, որ այս դպրոցը իսկապես կդառնա չնաշխարհիկ եւ կխորհրդանշի հայ-չինական ամուր հարաբերությունները»,-ասաց նա:
