«Բազմաթիվ քաղաքացիներ շարժման անունից գնում են գյուղեր ու պահանջում գյուղապետերի հրաժարականները (տեսանյութ)
Տարածքային կառավարման և զարգացման նախարար Սուրեն Պապիկյանը ֆեյսբուքյան իր էջում ուղիղ եթերով անդրադարձել է մարզպետերի նշանակմանը և այլ հարցերի, որոնք խիստ մտահոգիչ են: «Տարբեր մարդկանց անունների հետ կապված, թե իբր այդ մարդիկ շարժման կողմից պատրաստվում են նշանակվել մարզպետեր: Ես ուզում եմ ամենայն պատասխանատվությամբ հայտարարել, նաեւ հղում անել օրենքին, ըստ ՀՀ Սահմանադրության, մարզպետերին նշանակում է կառավարությունը՝ վարչապետի առաջարկությամբ: Եվ ինչպես մյուս նշանակումները, վստահ եղեք, որ ՀՀ կառավարության ղեկավարը կկատարի ճիշտ ընտրություն եւ դուք կունենանք այնպիսի պաշտոնյաներ, որոնք ամենայն պատասխանատվությամբ կկրեն իրենց առջեւ դրված բեռը: Այն մտահոգություններն ու խնդիրները, որոնք փորձում են առաջացնել, իրականության հետ առնչություն չունեն: Ես հիմա չեմ ուզում անդրադառնալ, թե ինչ անձերի շուրջ կան խոսակցություններ, դրանք իրականում երկրորդական են: Անդրադառնամ նաեւ մեկ այլ խնդրի՝ վերջին շաբաթվա ընթացքում բազմաթիվ քաղաքացիներ, շարժման անունից հանդես գալով, գնում են տարբեր գյուղերի համայնքապետարաններ եւ պահանջում են գյուղապետերի հրաժարականը՝ դա կապելով շարժման հետ: Ես ի պաշտոնե, ամենայն պատասխանատվությամբ հայտարարում եմ, որ շարժման օրակարգում նման քայլեր չկան»: Սուրեն Պապիկյանը նաեւ անդրադարձավ առաջին փոխվարչապետ Արարատ Միրզոյանի հետ կաթի գնի հետ կապված խնդիրների շուրջ աշխատանքային խորհրդակցություններին. «Արժանին պիտի մատուցենք այն տնտեսվարողներին, որոնք, լսելով փոխվարչապետի հորդորը, գնացին զիջման, հայտարարեցին, որ այս ամսվա ընթացքում կաթի գինը կմնա նույնը: Ես հիմա բոլոր գյուղացիներին հայտարարում եմ այս մասին եւ հորդորում եմ դադարեցնել փողոցի փակումը»: Պապիկյանը կոչ արեց բոլոր խնդիրների դեպքում դիմել կառավարություն:
