«Անկախ հանձնաժողովը կատարյալ ձախողում էր» (տեսանյութ)
Դադարեցվում է պայմանական վաղաժամկետ ազատելու եւ պատժի չկրած մասը ավելի մեղմ պատժատեսակով փոխարինելու հարցերով անկախ հանձնաժողովի գործունեությունը: Պատճառը նախագահի լիազորությունների փոփոխությունն է: Անկախ հանձնաժողովի գործունեությունից, սակայն, բոլորն էին դժգոհ: «Եթե իր գործառույթը մերժելն էր, ապա այդ առումով շատ լավ կատարեց, որովհետեւ շատ լավ մերժում էր, բայց եթե նայում ենք, իր դերը որն էր եւ ինչ պետք է աներ, կարելի է ասել կատարյալ ձախողում էր, որովհետեւ այդ մեխանիզմն, ըստ էության, Հայաստանում դարձավ չգործող»,-ասում է փաստաբան Ռոբերտ Ռեւազյանը: Ըստ վիճակագրության՝ տարեկան դիմում ներկայացրած դատապարտված անձանց միայն 5 տոկոսն է վաղաժամկետ ազատ արձակվել: Կառավարությունը նախագիծ է մշակել՝ առաջարկելով պատժից վաղաժամկետ արձակելը պայմանավորել քրեակատարողական եւ պրոբացիայի ծառայությունների որոշմամբ: Եթե ծառայությունները տվել են բացասական եզրակացություն, դատապարտյալը իրավունք ունի այն բողոքարկելու դատական կարգով. «Արդյո՞ք դատարանն անմիջապես քննելու է իրեն ազատ արձակելու հարցը, թե քննելու է Պրոբացիայի ծառայության տված եզրակացությունը ճիշտ է, թե ճիշտ չէ: Սա մի հարց: Երկրորդը, եթե քննելու է իր ազատ արձակելու հարցը, արդյոք դատարանը ի վիճակի է լինելու իրականացնելու արդար դատաքննություն: Այսօր դատարանները դեռ չեն հասել այն մակարդակին, որ դնեն արդարադատություն իրականացնեն»,- ասում է Ռոբերտ Ռեւազյանը: Անկախ հանձնաժողովը այս տարիների ընթացքում երբեւէ չի բավարարել 20 տարվա շեմը հատած ցմահ դատապարտյալների դիմումները: Փաստաբանն անդրադառնում է արդեն 23 տարի իր պատիժը կրող Ստեփան Գրիգորյանը դիմումի մերժմանը: Պատճառը այս տարիների ընթացքում նրա մոտ երկու հեռախոսի հայտնաբերումն է։ «Դա արդեն ծիծաղելի է: Հեռախոսը ինչի համար է, ընտանիքի հետ կապը պահելու համար է: Զրկում ես ազատություն վերադառնալ»: Երեկ ուժը կորցրած է ճանաչվել նաեւ Նախագահին առընթեր ներման հարցերի հանձնաժողովի մասին հրամանագիրը: