ՀՎԿ թեկնածուն դարձավ Վանաձորի քաղաքապետի տեղակալ. արտահերթ նիստ (տեսանյութ)
Այսօր Վանաձորի ավագանին արտահերթ նիստում հաստատեց ՀՎԿ խմբակցության ղեկավար Արկադի Փելեշյանի թեկնածությունը Վանաձորի քաղաքապետի առաջին տեղակալի պաշտոնում։ Վանաձորի քաղաքապետ Մամիկոն Ասլանյանը տեղեկացրել է, որ իր տեղակալներից Արտյոմ Գրիգորյանն է իր տեղը զիջել Ա. Փելեշյանին: Հաջորդ ավագանու նիստին արդեն Արկադի Փելեշյանը կզբաղեցնի քաղաքապետի կողքի աթոռը: Քաղաքապետ Մամիկոն Ասլանյանն անդրադարձել է նաեւ ՀՎԿ-ՀՀԿ հուշագրի ստորագրմանն ու դրան նախորդած, հաջորդած դեպքերին, նշեց, որ չի ցանկանում փողոցային որակումներ տալ լրատվամիջոցների տարաբնույթ հոդվածներին: Մասնավորապես, մամուլը հիշում էր ՀՎԿ անդամ Հեղինե Բիշարյանի հայտարարությունը, թե ՀՀԿ-ի օգտին քվեարկողը անբարոյական կլինի։ Հիշեցնենք, Հայաստանի հանրապետական (ՀՀԿ) և «Հայկական վերածնունդ» (ՀՎԿ) կուսակցությունների Վանաձորի տարածքային կառույցները նոյեմբերի 18-ին համագործակցության հուշագիր են կնքել՝ «քաղաքի կառավարման համամասնորեն և համատեղ պատասխանատվությունը ստանձնելու մասին»։ Ըստ հուշագրի՝ «Հայկական վերածնունդ»-ը կստանա քաղաքապետի տեղակալի պաշտոնը։ Իսկ այդ պաշտոնում առաջարկվել էր Ակա մականունով Արկադի Փելեշյանի թեկնածությունը։ Նոյեմբերի 10-ին Սահմանադրական դատարանը հակասահմանադրական ճանաչեց Վանաձորի ավագանու գումարած բոլոր նիստերը, ըստ որի՝ Վանաձորի համայնքի ավագանու 2017թ. մարտի 31-ին կայացրած որոշումները կորցրին իրենց իրավական ուժը մինչև 2018թ. մարտի 31-ը։ Հիշեցնենք, որ 2016 թվականի հոկտեմբերի 2-ին Վանաձորում կայացած ընտրություններից հետո ավագանու «Լուսավոր Հայաստան», ԲՀԿ եւ «Հայկական վերածնունդ» խմբակցությունները բոյկոտեցին ավագանու նիստերը և մինչ օրս չեն մասնակցում։ Վանաձորի քաղաքապետ Մամիկոն Ասլանյանը սակայն, մինչ օրս ավագանու նիստեր է գումարում՝ չունենալով մեծամասնություն։ Այսօր Արկադի Փելեշյանը լրագրողների հետ զրույցում նաև իր դժգոհությունն է հայտնել «Լուսավոր Հայաստան» խմբակցության ցուցակը գլխավորող Քրիստ Մարուքյանից, ապա ավարտել խոսքը՝ «վսյո, նաֆիգ» արտահայտությամբ։
