Խոսրովի արգելոցում բռնկված հրդեհի հիմնական օջախները մարվել են
Օգոստոսի 16-ին ժամը 17:30-ի դրությամբ հաջողվել է մարել մնացած 2.5 կմ պարագծում շարունակվող հրդեհի հիմնական օջախները: Ներկա պահին արգելոցում իրականացվում են հետմարման աշխատանքներ: Այս մասին հայտնում են ԱԻՆ Հասարակայնության հետ կապերի բաժնից։ ՀՀ ՌԴ ԱԻՆ «ԻԼ-76» ինքնաթիռը շարունակում է օդային հրդեհաշիջման աշխատանքները՝ ստեղծելով անվտանգության գոտիներ և խոնավ միջավայր՝ օջախների կրկնակի բռնկումը բացառելու նպատակով: Այս պահին Խոսրովի արգելոցի տարածքում անձրև չի տեղում, ՀՀ ԱԻՆ Հիդրոօդերևութաբանության և մթնոլորտային երևույթների վրա ակտիվ ներգործության ծառայության տվյալներով՝ անձրևը սպասվում է ժամը 19:00-ից հետո: Ինքնաթիռի հետագա թռիչքների և լայնածավալ աշխատանքների իրականացման վերաբերյալ որոշումը կկայացվի վաղը առավոտյան՝ հետախուզական տվյալների ուսումնասիրության արդյունքում: Հիշեցնենք, ռուսական ինքնաթիռը վերջին 2 օրերի ընթացքում 10 թռիչք է իրականացրել արգելոցի վրայով՝ հրդեհաշիջման աշխատանքներ իրականացնելով։ Խոսրովի արգելոցի հրդեհը բռնկվել էր օգոսոտսի 12-ին։
