Կինոդիտումներ և համերգ՝ պատմամշակութային արգելոց-թանգարաններում
«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ը ընդլայնում է մշակութային միջոցառումների շարքը և ձևաչափը: Հուլիսի 30-ին, ժամը 21.00-ին «Գառնի» պատմամշակութային արգելոց-թանգարանում գիշերային գեղարվեստական լուսավորությամբ այցելուների համար ելույթ կունենա «Կամերային երաժշտության ազգային կենտրոն» ՊՈԱԿ-ի Հայաստանի պետական կամերային երգչախումբը` գեղարվեստական ղեկավար և դիրիժոր, ՀՀ արվեստի վաստակավոր գործիչ Ռոբերտ Մլքեյանի գլխավորությամբ: Հուլիսի 29-ին, ժամը 20. 30-ին «Զվարթնոց» պատմամշակութային արգելոց-թանգարանի բացօթյա կինոսրահում կցուցադրվի ամերիկյան բոլոր ժամանակների 100 լավագույն կինոնկարների շարքին դասված (զբաղեցրել է 53-րդ տեղը), 8 «Օսկար», 4 «Ոսկե գլոբուս» մրցանակների ու մի քանի այլ հեղինակավոր պարգևների արժանացած «Ամադեուս» ֆիլմը: 1984 թ. ռեժիսոր Միլոշ Ֆորմանի նկարահանած կինոնկարի հիմքում երգահան Անտոնիո Սալիերիի կողմից Ամադեուս Մոցարտի նկատմամբ տածած նախանձի և այդ պատճառով նրա թունավորման պատմությունն է։ Տոմսի արժեքը` 500 ՀՀ դրամ է: «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ