Ոստիկանները օրենքի փոխարեն զգացողություններով են առաջնորդվում. ՀՔԱՎ
Լրագրող Արփի Մախսուդյանի բնակարան մուտք գործելու և խուզարկության փորձ կատարելու՝ քաղաքացիական հագուստով ոստիկանների գործողությունները վարույթն իրականացնող մարմինը որակել է որպես պաշտոնեական լիազորությունների գերազանցում: ՀՀ Հատուկ քննչական ծառայությունում Քրեական օրենսգրքի 309-րդ հոդվածի 2-րդ մասով հարուցված քրեական գործի շրջանակում Արփի Մախսուդյանի ներկայացուցիչ, ՀՔԱ Վանաձորի գրասենյակի փաստաբան Անի Չատինյանի ներկայացրած միջնորդությունը բավարարվել է, և Արփի Մախսուդյանը տուժող է ճանաչվել: Մինչ այդ հանցագործության մասին հաղորդում ներկայացնելուց օրեր անց հարուցված քրեական գործում լրագրողը ներգրավված է եղել որպես վկա և հարցաքննվել այդ կարգավիճակում, այնիչնչ ի սկզբանե պետք է քրեական գործ հարուցելուց հետո Մախսուդյանների ընտանիքը տուժող ճանաչվեր: Հիշեցնենք՝ քաղաքացիական հագուստով ոստիկանները լրագրողի տուն էին մտել 2017 թ. մայիսի 11-ին՝ առավոտյան 7:30-ին, և հայտարարել, որ տեղեկատվություն ունեն, թե բնակարանում հանցագործ է թաքնվում: Ա. Մախսուդյանի հարցին՝ խուզարկելու թույլտվություն ունեն, թե՝ ոչ, նրանք պատասխանել են՝ ոչ, ինչից հետո պահանջել է հեռանալ բնակարանից: Դրանից հետո ոստիկաններն սկսել են ագրեսիվ վարք դրսևորել, սպառնացել են բաժին տանել նրա սկեսրայրին: Ոստիկանների վերաբերմունքը փոխվել է միայն այն բանից հետո, երբ Ա. Մախսուդյանը փորձել է հեռախոսով կապվել իրավաբանի հետ: Նա հրաժարվել է նաև պատասխանել ոստիկանների հարցերին, ինչից հետո վերջիններս, սպառնալիքներ հնչեցնելով և ընտանիքի անդամներին ահաբեկելով, հեռացել են: Մեզ հետ զրույցում Ա. Մախսուդյանը հայտնեց, որ Ոստիկանությունը ժխտում է, թե խուզարկելու նպատակով են բնակարան մտել, և այցը պատճառաբանում է հետախուզման մեջ գտնվող անձին փնտրելով: Ոլորտը կարգավորող օրենսդրությունը անձի բնակարանում խուզարկություն իրականացնելու համար պարտադիր է համարում դատարանի որոշումը, ինչն այս դեպքում առկա չի եղել: Իսկ թե ինչպես էին առանց խուզարկություն իրականացնելու, գտնելու հետախուզվողին, կարող ենք միայն ենթադրել. ոստիկանները փորձել են տանտերերի պահվածքից դա զգալ կամ հետախուզվողին տեսնել հյուրասենյակում և հայտնաբերել նրան: Ավելին՝ ԱՅՍՏԵՂ
