«Իշխանությունները ցանկանում են դատավորներին դուր գալ» (տեսանյութ)
Դատավորները, դատախազները եւ քննիչները պետք է բարձր աշխատավարձ ստանան. կարծում է նախկին պատգամավոր Պարգեւ Օհանյանը: 65 տարին չլրացած ու 20 տարվա ստաժ ունեցող դատախազների ու քննիչների թոշակի գնալու և նրանց բավականին բարձր թոշակ նշանակելու հարցը լուրջ դժգոհություն է առաջացրել: «Դատավոր լինի, դատախազ, թաղապետ, քաղաքապետ: Եթե նա ստանում է 160 հազար դրամ աշխատավարձ, ինչքան իմ օրոք էին ստանում դատավորները, նրանից չես կարող պահանջես, որ հեռու լինի կոռուպցիայից: Բայց եթե մարդը ստանում է 600 հազար, 800.000, մեկ մլն դրամ աշխատավարձ, բնականաբար որեւէ կերպ արդարացված չի լինի նրանց կոռուպցիոն հավակնությունները»,- այսօր լրագրողների հետ զրույցում ասաց Պարգեւ Օհանյանը Նախկին դատավորը հիշեցրեց, որ նախորդ օրենքն ընդունվել էր 2014թ-ին եւ նպատակ ուներ թարմացնել դատախազության կադրերը եւ հին կադրերը թոշակի անցնելու շահագրգռվածություն ունենան։ «Ստաժ ունեցողները արդյունքում եւ թոշակ էին ստանում, եւ փաստաբանական գործին էին անցնում: Այս դեպքում, կարծում եմ, որ շահեց արդարադատությունը, որովհետեւ դատախազությունը թուլացավ, փաստաբաններն էլ ուժեղացան: Շահեց փաստաբանական համայնքը՝ ի դեմս փորձառու դատախազների»,-ասաց Պարգեւ Օհանյանը: «Ընդդեմ իրավական կամայականությունների» ՀԿ նախագահ Լարիսա Ալավերդյանը եւս կարծում է, որ պետք է կադրային փոփոխություն լինի։ Ըստ նրա՝ դատական, դատախազական համակարգի աշխատավարձը բարձրացնելով ապահովում են դատավորի անկախության կարևոր երաշխիքը. «Պետք է ոչ միայն ապահովված լինի բարձր աշխատավարձով աշխատանքի ժամանակ, այլ չունենա գայթակղություն՝ կուտակելու անարդար փողերով թոշակի տարիքի կյանքն ապահովվելու համար»: Մարդու իրավունքների նախկին պաշտպանը հիշեց, որ դատախազների աշխատավարձը բարձրացվել է 2008 թ մարտի 1-ից հետո, ինչը դիտվեց որպես կաշառք, քանի որ չբացահայտվեցին մարտի 1-ի սպանության դեպքերը: Լարիսա Ալավերդյանի խոսքերով՝ ճիշտ կլիներ, որ խորհրդարանն օրենքի ընդունման հարցում շտապողականություն չցուցաբերեր. «Այդ շտապողականությունը կամ այլ նպատակ է հետապնդում, կամ իշխանությունները ցանկանում են դատավորներին դուր գալ: Ավելի են սերտանում իշխանություններ-դատական համակարգ հարաբերությունները»: Ըստ Լարիսա Ալավերդյանի՝ ավելի սերտանում են այդ իշխանությունները իրար հետ, ստեղծում են ոչ թե հակակշիռ, այլ իրար հետ համաձայնվելու մեխանիզմը:
