«Արհեստական ապացույցներով գործ են սարքել». պաշտպան
Հիմնադիր խորհրդարանի անդամ Արմեն Միքայելյանից այսօր դատավորը հետաքրքրվեց, թե ինչով է նա զբաղվում: «Քաղաքականությամբ»,- եղավ պատասխանը: «Ինչով զբաղվում էի տվյալ պահին, դրա համար էլ նշեցի, թաքցնելու ոչ մի բան չունեմ»,- ասաց Արմեն Միքայելյանը: Հիմնադիր խորհրդարանի, «Սասնա ծռեր» քաղաքական խորհրդի անդամ Արմեն Միքայելյանը մեղադրվում է ապօրինի կերպով զենք և ռազմամթերք պահելու, կրելու համար։ Ըստ ոստիկանության` նրա մոտից խուզարկությամբ հայտնաբերվել է թմբուկավոր ինքնաշեն ատրճանակ` լիցքավորված 7 փամփուշտով: «Իմ մոտ զենք չի եղել: Ես դատարանում եւս նշեցի: Ավելի մանրամասն կներկայացնեմ, երբ որ ցուցմունքների ժամանակը գա, դեռեւս ցուցմունք չեմ տվել»,- ավելացրեց Արմեն Միքայելյանը: Այսօրվա դատական նիստը կարճ տեւեց: Ընթերականերից մեկը չէր ներկայացել դատական նիստին: Դատավորը նրան բերման ենթարկելու որոշում կայացրեց: Գործով դատական նիստը կշարունակվի հոկտեմբերի 6-ին: Պաշտպան Երվանդ Վարոսյանը նշում է՝ արհեստական ապացույցներով գործ են սարքել, որի հետքերը պարզ երեւում են: Մանավանդ որ քրեական գործում չկա Արմեն Միքայելյանի անձնական խուզարկության տեսագրությունը: «Նախաքննության մարմնին իրականում չէր հետաքրքրում` այդ ատրճանակը կրե՞լ է անձը, թե՝ ոչ: Հետաքրքրում էր, որ արագ քրեական գործը ուղարկեն դատարան, այս ամենը մի միտում ուներ՝ Արմեն Միքայելյանին պատասխանատվության ենթարկել, ոնց կստացվի, կստացվի»,- ավելացրեց պաշտպանը: Արմեն Միքայելյանը բերման էր ենթարկվել հուլիսի 27-ին, Խորենացիում կայացած ակցիայից հետո։ Նրան կալանավորել են, բայց օգոստոսի 16-ին խափանման միջոցը փոխվել է գրավով։
