Վարուժան Ավետիսյան. «Բնական է, որ ԱԱԾ-ի համար մենք հանցագործներ ենք»
Հարցազրույց Էրեբունու ՊՊԾ շենքը գրոհածներից Վարուժան Ավետիսյանի հետ -Ինչու՞ եք պահում Օսիպյանին եւ Վարդան Եղիազարյանին: -Իսկ ի՞նչ տարբերություն մյուս ոստիկանների եւ իրենց միջեւ: Ավելի լավ, որ բարձրաստիճան են: Ավելի մեծ երաշխիք են էս պայմաններում: -Կա տեսակետ, որ ՊՊԾ-ի շենքը գրոհելով եւ ոստիկանի մահով դուք հաստատել եք Ժիրայր Սեֆիլյանին ուղղված մեղադրանքը: -Իհարկե համաձայն չեմ: Ժիրայր Սեֆիլյանը դրա հետ կապ չունի: Խնդիրը պետք է ավելի լայն համատեքստում դիտարկել: Եթե ժողովրդի իշխանությունը յուրացված է եւ ժողովուրդն այլ ձեւ չունի իր իշխանությունը վերահաստատելու, ապա միակ տարբերակը զինված ապստամբությունն է: Ապստամբությունը ժողովրդի սրբազան իրավունքն է, որը ամրագրված է նաեւ միջազգային իրավունքով եւ բխում է մի շարք երկրների Սահմանադրություններում ուղիղ ձեւով: Եվ առհասարակ, բոլոր ժողովրդավարական երկրների Սահմանադրություններում դա ամրագրված է հենց այն դրույթով, որ իշխանությունը պատկանում է ժողովրդին: Ժողովուրդը իրավունք ունի իր իշխանությունը վերահաստատել ցանկացած եղանակով, այդ թվում, զինված ապստամբության միջոցով: Մենք օրինակ ենք ծառայել ժողովրդի համար զինված ապստամբություն կատարելու եւ մենք համոզված ենք, որ վաղ թե ուշ էդ օրինակը վարակիչ է լինելու եւ մեր երկրում ի վերջո հաստատվելու է ժողովրդի իշխանությունը: Ինչ վերաբերվում է այդպիսի տեսակետներ հայտնողներին, բացի մոլորության մեջ գտնվողներից, ես մյուսների վերաբերյալ ընդամենը մի հաստատում կարող եմ անել, որ նրանք կամ Հայաստանում ժողովրդի իշխանությունը յուրացրած հանցավոր համագործակցության անդամներ են կամ նրանց աջակիցներ: Այլ կերպ այդպիսի կարծիք ունեցողներին չի կարելի որակել, որովհետեւ, եթե մարդը չի ուզում, որ Հայաստանում ժողովրդի իշխանությունը վերականգնվի, ուրեմն այդ մարդը հասկանալի է, թե ով է եւ ինչ շահեր է սպասարկում: -Պարոն Ավետիսյան, ինչու՞ հենց ՊՊԾ շենքը -Դա տեխնիկական մարտավարական խնդիր է, հասանելիության, հարմար լինելու, ծավալվելու եւ այլ առումներով: Մանրամասները չեմ ուզում ասել: -Կա տեղեկություն, որ ձեզ մոտ երկու վիրավոր կա, ճի՞շտ է: -Ոչ, ոչ, մենք ոչ մի վիրավոր չունենք: Թեթեւ վնասվածք ունեցողներ կան, լուրջ բան համարել... -Ալեք Ենիգոմշյանն ասել է, որ ձեզ մոտ երկու վիրավոր կա, մեկը՝ ծանր: -Վիրավոր՝ վնասվածքներ ունեցողներ, բայց՝ ոչ ծանր վիրավոր: Մեկը կողքի քերծվածք ունի գնդակային, բայց ոչ մի վտանգ չի սպառնում առողջությանը, մյուսը, որ գլխով հարվածել էր մեքենայի դիմապակուն, ճակատային մասում պատռվածք ուներ, կարել են եւ հիմա իրեն լավ է զգում: -Պարոն Ավետիսյան, դուք փաստորեն զինված եք մտել ՊՊԾ շենք: -Բնականաբար: Անզեն չէինք մտնելու: -Տեղյա՞կ եք, որ ԱԱԾ-ն ձեզ այսպես ասած ահաբեկիչ է բնորոշել եւ ասել է, որ դուք վտանգ եք ներկայացնում: -ԱԱԾ-ն հանցավոր համագործակցության սպասարկող հիմնական կառույցներից մեկն է: Բնական է, որ ԱԱԾ-ի համար մենք հանցագործներ ենք: Առհասարակ, բռնապետության համար իր բռնապետությունը տապալելու ցանկություն ունեցող եւ այդ ցանկությունն իրագործելու քայլեր կատարող ցանկացած անձ ահաբեկիչ է, հանցագործ եւ պետք է ենթարկվի պատասխանատվության: Իսկ երբ ժողովուրդը հաղթում է, մենք ունենում ենք Չաուշեսկու, Յանուկովիչ, ունենում ենք Կադդաֆի: Դա պետք չի դիտարկել Բ-26-ի կամ ԱԱԾ-ի, ոստիկանության պատկերացումների կամ այդ պատկերացումները ձեւավորող շահերի տիրույթում: Դա մակերեսային եւ սխալ մոտեցում է: -Դուք չե՞ք կարծում, որ ձեզ ահաբեկիչ են համարել, որպեսզի, այսպես ասած, հեշտ լինի ձեզ ոչնչացնելը, կներեք ձեւակերպման համար: -Էդ հասկանալի է, այո, այո, իհարկե, անշուշտ, միանշանակ, երկրորդ կարծիք լինել չի կարող: -Դուք պահանջում եք նաեւ Սերժ Սարգսյանի հրաժարականը: Անձամբ կուզեի՞ք այդ հարցով բանակցել Սերժ Սարգսյանի հետ: -Նաեւ չէ, դա մեր հիմնական պահանջն է: Բնականաբար ողջամտության տեսակետից պետք է հասկանալ, որ այդ պահանջը ապստամբության ծավալման բավարար ծավալի եւ խորության հասնելու հանգամանքի հետ է կապված: Եթե ապստամբությունը դեռ այդ աստիճանի չի հասել, պահանջ որպես պահանջ, մեր մոտեցումն է դա եւ մենք դա ներկայացնում ենք: Բայց իրատեսականության առումով դա իրատեսական է այն ժամանակ, երբ ժողովուրդը ոտքի է կանգնում: Ես արդեն ասեցի, որ մենք օրինակ էինք ծառայում ժողովրդին դրանով, որ այդ բռնկումը տեղի ունենա: -Դուք իրատեսական չեք համարում իր հրաժարականն էս պահին: -Անշուշտ: Եթե մենք այսպես այս պահին այսքան ուժ ունենք, բնականաբար դա իրատեսական չէ: Միամտություն կլինի, եթե ես հակառակ կարծիք արտահայտեմ: Քաղաքականությունը ուժերի հարաբերակցությամբ պայմանավորված գործընթաց է: Այս պահին ուժերն այնպիսի հարաբերակցության մեջ են, որ իրատեսական չէ նման եզրակացություններ կատարելը: Պահանջը մնում է պահանջ, բայց սպասել, որ այդպիսի արդյունք կլինի միայն մեզանով, ճիշտ չի լինի: -Պարոն Ավետիսյան, իշխանությունը ձեզ ի՞նչ տարբերակներ է առաջարկել փոխզիջումային: -Չէ, փոխզիջումային տարբերակ իշխանությունը չի առաջարկել, բայց պարոն Սեֆիլյանը հանգուցալուծման երրորդ տարբերակ է առաջարկել հանգուցալուծման, որ հիմա քննարկվում է, տեսնենք, թե ինչ արդյունք կլինի: -Երրորդ տարբերակը ենթադրու՞մ է պատանդներին անվերապահ բաց թողնել: -Ես չեմ կարող նախ ասել, թե ինչի մասին է, երկրորդ, դրանք դետալներ են, որի մասին պայմանավորվածություն պիտի լինի հետագայում: -Ի՞նչ տարբերություն ձեր արարքի եւ ահաբեկչության միջեւ: -Ես արդեն իմ պատասխանի ամբողջ համատեքստում կոնկրետ ձեւակերպումներով այդ հարցին անդրադարձա: Սա զինված ապստամբություն հարուցելու գործողություն է, որն այս պահին սահմանափակ տարածքում է եւ սահմանափակված վիճակում է: Ահաբեկչությունը լրիվ այլ բան է, ահաբեկչությունը հանցավոր նպատակներ է դնում հանցավոր նպատակներ է հետապնդում եւ կատարում է դա ահաբեկչական մեթոդներով: Մենք ահաբեկչական գործողություն չենք կատարել, մենք ապստամբություն ենք բարձրացրել: -Իսկ պատրա՞ստ եք կանգնել արդարադատության առաջ: -Մենք արդարադատություն չունենք: Մենք ոտքի ենք ելել, զենք ենք վերցրել նաեւ արդարադատություն ունենալու համար, ոչ թե մանթոյի դատարանի առաջ կանգնելու համար: -Շնորհակալություն:
