«Պապի տված օրհնված խաչը ես սրբությամբ կպահպանեմ» (տեսանյութ)
Հայոց ցեղասպանության անմեղ զոհերի հուշահամալիր տանող բոլոր ճանապարհները վաղ առավոտից փակ էին. հուշահամալիր էր այցելելու Հռոմի Պապ Ֆրանցիսկոս 1-ինը:
Մինչ նրա գալը հուշահամալիրում նախապատրաստական աշխատանքներ էին ընթանում՝ եկան եւ դեպի հուշահամալիր տանող ճանապարհի երկայնքով կանգնեցին հայորդաց տան սաները՝ սպիտակ, դեղին, մանուշակագույն վերնաշապիկներով, որոնց վրա անգլերեն գրված էր՝ «Ֆրանցիսկոս Պապ»: Նրանց ձեռքերին կար նաեւ Հայոց ցեղասպանության սրբադասված անմեղ զոհերի խճանկարը: Ի դեպ, հուշահամալիր բերվեց նաեւ խճանկարի ավելի մեծ պատկերը: Երեխաներին համակարգում էր հայր Կոմիտաս վարդապետ Հովնանյանը:
Հուշահամալիր եկան նաեւ բազմաթիվ հայտնի հասարակական-քաղաքական գործիչներ՝ բարեգործ-գործարար Ռուբեն Վարդանյանը, դուդուկահար Ջիվան Գասպարյանը, «Հայաստանի ժուռնալիստների միության» նախագահ Աստղիկ Գեւորգյանը, ՀՊՄՀ ռեկտոր Ռուբեն Միրզախանյանը եւ այլոք:
Հռոմի պապ Ֆրանցիսկոս 1-ինը հուշահամալիր եկավ օրակարգով նշված ժամին՝ Սերժ Սարգսյանի ու նրա տիկնոջ՝ Ռիտա Սարգսյանի, Ամենայն հայոց կաթողիկոս Գարեգին Բ-ի եւ հոգեւոր դասի ուղեկցությամբ:
Հռոմի Պապ Ֆրանցիսկոս 1-ինը նախ կանգ առավ ծաղկեպսակի առջեւ, աղոթեց, ապա միայն իջավ անմար կրակի մոտ, որտեղ Գարեգին Բ-ի հետ միասին անցկացրին հատուկ աղոթքի արարողություն:
Այնուհետեւ Ֆրանցիսկոս 1-ինը գրառում կատարեց հյուրերի գրքում, որից հետո հանդիպեց Հայոց ցեղասպանության վերապրածների ժառանգներին եւ նրանց նվիրեց Վատիկանից բերված օրհնված խաչեր: «Ա1+»-ի հետ զրույցում նրանցից Ալիսա Մկրտչյանն ասաց, որ Հռոմի պապն իրենց ցավակցել է, հայտնել իր զորակցությունը. «Պապի հետ հանդիպումն իմ երջանիկ օրերից ամենաերջանիկ օրն էր: Ամբողջ մարմնով ես դողում էի: Նրա տված օրհնված խաչը ես սրբությամբ կպահպանեմ»:
Հռոմի Պապ Ֆրանցիսկոս 1-ինը Ցեղասպանության հուշահամալիրից հեռացավ իր փոքրիկ, սպիտակ մեքենայով, որին հաջորդեց անվտանգության մեքենաների շարասյունը:
