Ինքնուրույն չքայլող եւ չսնվող կալանավորին բաց չեն թողնում (տեսանյութ)
Խարդախության համար մեղադրվող 51- ամյա Աշոտ Սարգսյանը նույնիսկ ի վիճակի չէ մասնակցել իր գործով դատական նիստերին, բայց նրա խափանման միջոցը այդպես էլ մնում է կալանքը։ «Շուրջօրյա թթվածնային թերապիա է ստանում, գամված է անկողնուն: Զրկված է ինքնուրույն սնվելու, սանհանգույցից օգտվելու իրավունքից»,- «Ա1+»-ին ասաց նրա պաշտպան Արթուր Սարգսյանը: Առողջապահության նախարարության միջգերատեսչական փորձագիտական հանձնաժողովի եզրակացության համաձայն եւս Աշոտ Սարգսյանը իր բուժումը պետք է ստանա նեղ մասնագիտացված բուժհաստատություններում, չի կարող մասնակցել դատական նիստերին, ինչպես նաեւ ճանաչվել է 1-ին կարգի անժամկետ հաշմանդամ: Կալանավորի մոտ հայտնաբերվել են այնպիսի հիվանդություններ, որոնք պատժի հետագա կրման հետ անհամատեղելի են: Այսօր Արարատի եւ Վայոց ձոր մարզերի ընդհանուր իրավասության դատարանում պետք է քննարկվեր Աշոտ Սարգսյանի խափանման միջոցը փոխելու հարցը, սակայն դատավոր Լեւոն Արազյանի վատառողջ լինելու պատճառաբանությամբ դատական նիստը չկայացավ: «Նշված շինծու քրեական գործը քայլ- քայլ ստիպելով առաջ են տանում, բացառապես օգտագործելով բազմաթիվ ամպագոռգոռ անուններ, նաեւ այնպիսի անձանց անուններ, որոնք տեղյակ չեն»,- ավելացրեց փաստաբանը: Աշոտ Սարգսյանը մեղադրվում է ԶՈՒ օպերատիվ կառավարման և իրավիճակների վերահսկման կենտրոնի տեսակոնֆերանս համակարգի ստեղծման համար Պաշտպանության նախարարությունից առանձնապես խոշոր չափերի գումար հափշտակելու մեջ: «Զավեշտի եւ աբսուրդի է հասնում, գործում առկա չէ որեւէ հանցակազմ. Մասնակցելով մրցույթի հաղթել է մրցույթը: Կնքվել է ակտ, ըստ որի կողմերը միմյանց նկատմամբ պահանջ չունեն: Այդպիսի վերաբերմունք է առկա նաեւ ՊՆ-ի կողմից նաեւ այսօր, համակարգը մինչ օրս անխափան աշխատում է եւ շահագործվում է»,-նշեց Արթուր Սարգսյանը: Պաշտպանը նաեւ ավելացնում է՝ տուժողի կողմից քաղհայց չի ներկայացվել: Մեկ տարի գործի նախաքննությունն ընթացել է առանց տուժողի եւ ավարտից 10 օր առաջ գործով ներգրավել է տուժող: Ի դեպ, գործը հարուցվել է մրցույթը չշահած ընկերության բողոքի հիման վրա: Իսկ հարազատները պնդում են, որ ամեն ինչ անելու են հաշմանդամության առաջին կարգ ունեցող Աշոտ Սարգսյանի խափանման միջոցը փոխելու համար:
