Գայլի հարձակմանը ենթարկված կնոջը վիրահատել են
Խաչիկ գյուղում գայլի հարձակմանը ենթարկված 75- ամյա կնոջ վիրահատությունը «Էրեբունի» հիվանդանոցում ավարտվել է։ Այն գրեթե 4 ժամ է տևել: Վիրահատարանում միաժամանակ աշխատել են մի քանի խմբեր` միկրովիրաբուժական, պլաստիկ և դիմածնոտային: Ըստ հիվանդանոցի մամլո խոսնակ Շուշան Հունանյանի՝ բժիշկներ Արա Հայրապետյանը, Արտյոմ Իկիլիկյանը և Արամ Բորոյանը նախ վիրաբուժական մշակում են կատարել, հատուկ իմպլանտի միջոցով վերականգնել են աջ այտոսկրի կոտրվածքը: Վիրահատական մշակման են ենթարկվել նաև ձեռքերը, որոնք ևս վնասված են եղել: Իսկ աջ կողմի այտի և քթի հատվածում մաշկի վնասվածքը կվերականգնվի հաջորդ վիրահատության ընթացքում, որը նախատեսվում է իրականացնել մի քանի շաբաթ անց: Հիվանդը այժմ գտնվում է վերակենդանացման բաժանմունքում, շնչում է արհեստական սարքի միջոցով:
