Հենրիխ Մխիթարյանը նվերներ է բաժանել երեխաներին
Ֆուտբոլի Հայաստանի հավաքականի կիսապաշտպան Հենրիխ Մխիթարյանն այսօր անակնկալ այցելություն է կատարել «Զատիկ» երեխաների աջակցության կենտրոն: Այդ մասին տեղեձկացնում է Հայաստանի ֆուտբոլի ֆեդերացիայի մամուլի ծառայությունը:
Հենրիխ Մխիթարյանի այցելությունը մեծ խանդավառություն է առաջացրել երեխաների շրջանում, որոնք ճանաչում և սիրում են Հենրիխին, դիտում նրա մասնակցությամբ հանդիպումները, ուրախանում նրա հաջողություններով:
Հայաստանի հավաքականի ավագը սեղանի թենիս է խաղացել երեխաների հետ, լուսանկարվել գրեթե բոլորի հետ: Հենրիխ Մխիթաքրյանը երեխաների հետ արտասանել է Հայր Մերը, որից հետո նրանց շնորհավորել է Ամանորի և գալիք Սուրբ Ծննդյան տոնի կապակցությամբ:
Այնուհետև մեր հավաքականի ֆուտբոլիստը բոլոր երեխաներին հանձնել է նվերներ, իսկ «Զատիկ» երեխաների աջակցության կենտրոնին՝ համակարգիչներ: Վերջում երեխաները ներկայացրել են իրենց կողմից բեմադրված պարային համարներ:
