«Սահմանադրությո՞ւնն է մեղավոր, որ մի անասուն ջարդուփշուր է անում…» (տեսանյութ)
Ոչ իշխանական եռյակի մարզային հանրահավաքների հաջորդ կետը Կոտայքի մարզի Հրազդան քաղաքն է։ Մինչեւ հանրահավաքի սկսվելը, ԲՀԿ մամուլի խոսնակ Տիգրան Ուրիխանյանը բոլոր հավաքվածներին կոչ արեց մոտենալ. «Եկեք, եկեք, հավաքվեք, մոտեցեք, մեկ- երկու րոպեից կսկսենք հանրահավաքը»։ «Բանը բանից արդեն անցելա՝ ինչպես ժողովուրդն է ասում։ Աղքատություն, անարդարություն, հուսալքություն»,- ասաց Տիգրան Ուրիխանյանը եւ հավելեց, որ հենց այդ է պատճառը, որ ոչ իշխանական ուժերը ձեւավորել են միասնական օրակարգ եւ հանդիպում են ժողովրդին։ «Առանց ժողովրդի ուժի ոչ մի փոփոխության հասնել չի լինի,-հայտարարեց ԲՀԿ խմբակցության քարտուղար Նաիրա Զոհրաբյանը,-Ես հարցնում եմ՝ արդյո՞ք սահմանադրությունն է մեղավոր, որ երեկ ոսկու շուկայում մի կենդանի, մի անասուն, ջարդուփշուր է անում մարդկանց տաղավարները և ասում՝ լավ եմ անում։ Մտեք արտագաղթի ավտոբուսները և հարցրեք՝ արդյո՞ք սահմանադրությունն է մեղավոր. որ մարդիկ արտագաղթում են։ Սահմանադրական փոփոխություններով իշխանություններն ուզում են վերարտադրվել։ Մենք պետք է բոլորով միասին ոտքի բերենք ծնկի եկած հայրենիքը»։
