«Անփոխարինելի պաշտոնյա կա՞»
Վերահսկիչ պալատի հաշվետվությունը լսելուց հետո ԱԺ նախագահ Հովիկ Աբրահամյանը հայտարարեց, որ զարմացած է. «Փաստորեն, գործ ունենք թալանչիների հետ, ու ոչ մի քայլ այդ ուղղությամբ չի իրականացվում: Ես կարծում եմ՝ ներկայացված բոլորի նյութերն էլ պետք է ուղարկվեն դատախազություն, քանի որ ամեն տարի խոսվում է այդ մասին ու ոչ մի շարժ չկա: Սրա վերջին ի՞նչ է լինելու, բյուջեի իրական փողերը որոշ մարդիկ լափում են, ու պատկան չինովնիկներն ի՞նչ պատասխան են տալիս»:
Իշխան Զաքարյանն արձագանքեց՝ ասելով. «Մի մասի գործերն արդեն դատախազությունում են, մյուսների պատասխաններն էլ տեղադրված են կառավարության կայքում: Իհարկե, կան պատասխաններ, որոնք կարելի է ընդամենը համարել պատասխան: Շարունակում են խնդրահարույց մնալ գնումների ու շինարարության բնագավառները: Պետք է համատեղ աշխատենք, որ իրավիճակը շտկվի»:
Հովիկ Աբրահամյանին պատասխանը չբավարարեց. «Եթե որեւէ պատիժ չենք կիրառում, տպավորություն է ստեղծվում, որ մենք էլ ենք մասնակից դառնում այդ հանցագործություններին: Անփոխարինելի պաշտոնյա կա՞, պարոն Զաքարյան, մենք պետք է ազատվենք նմանատիպ չարաշահող պաշտոնյաներից: Ես զարմացած եմ. ձեր ներկայացրած տվյալները պետք է ունենան լուրջ հետեւանքներ: Ի դեպ, ասածներիս պատասխան չեմ ակնկալում»:
Այնուամենայնիվ, Իշխան Զաքարյանն արձագանքեց. «Բաց, հրապարակային խոսելը այս իշխանության համարձակ դիրքորոշումն է»:
ԱԺ փոխնախագահ Էդուարդ Շարմազանովը եւս հանդես եկավ արտահերթ հարցով. «Դուք նշեցիք, որ հիմնական չարաշահումները շինարարությսն եւ գնումների գործընթացում են, ես հասկացա, որ խնդիրները շատ-շատ են: Եթե մարդ թերացել է մի բան է, եթե մսխել է՝ մեկ այլ բան: Ինչ է նշանակում՝ չկատարված աշխատանքների դիմաց վճարում, դա, հո, հոր տնից չի բերել, չէ որ դրանք հարկատուների ու ժողովրդի գումարներն են: Մենք օր առաջ պետք է ազատվենք այդ կոռումպացված չինովնիկներից: Ինձ հետաքրքրում է նաեւ՝ քանի քրեական գործ է հարուցվել այս զեկույցից հետո: Սա ես քաղաքական հայտարարություն եմ անում՝ չաղ ու բախտավոր չինովնիկների ժամանակներն անցել են»:
Իշխան Զաքարյանը վստահեցրեց, որ լիովին կիսում է նրա կոչը. «Մենք այդ ուղղությամբ աշխատում ենք: Ես կոչ եմ արել բոլոր խմբակցություններին՝ աշխատել մեզ հետ: Այո, կան կոռուպցիոն լրջագույն ռիսկեր, բոլորն այդ մասին խոսում են, իսկ մենք ասում ենք թե ընդդիմությանը, թե իշխանություններին, եկեք միասին այդ խնդիրները լուծենք: Ինչ վերաբերում է պատժելուն, ապա դա մեր խնդիրը չէ. մենք պատժիչ գործառույթ չունենք»:
ԱԺ փոխնախագահն արձագանքեց նրան. «Ես չեմ կարծում, որ Վերահսկիչ պալատը պետք է արհեստական դամոկլյան սուր լինի. թացը չորից տարբերենք ու այդ չինովնիկները պետք է լինեն համապատասխան վայրերում: Ով պատրաստ չէ նորմալ աշխատել կամ պետք է գնա իրենց տուն, կամ նորմալ աշխատի»:
