«Աստծու ձեռքը» շնորհավորեց Հռոմի պապին
«Ֆուտբոլի Աստծուց բացի այժմ Հռոմի պապն էլ է արգենտինացի: Անչափ երջանիկ եմ: Եթե լինեմ Իտալիայում, ապա կաշխատեմ հանդիպել նրա հետ» - սոցիալական ցանցում գրել է արգենտինացի աշխարհահռչակ ֆուտբոլիստ Դիեգո Մարադոնան:
52-ամյա վետերանը ֆուտբոլի Աստված հասկացողության տակ նկատի ունի իրեն, քանի որ 1986 թ աշխարհի առաջնությունում Անգլիայի հավաքականի դարպասը ձեռքով գոլ խփելուց հետո Մարադոնան հայտարարել էր, որ դա «Աստծու ձեռքն էր»:
Նշենք, որ մարտի 13-ից Հռոմի պապ է նշանակվել Բուենոս Այրեսի արքեպիսկոպոս Խորխե Մարիո Բերգոլիոն, որը այսուհետ կրելու է Ֆրանցիսկ 1-ին անունը:
Ի դեպ, Հռոմի նորընտիր պապը սպորտաձեւերից գերադասում է ֆուտբոլը: Զարմանալի չէ, որ նրան շնորհավորել է նաեւ Արգենտինայի ֆուտբոլի հավաքականի եւ իտալական «Ինտերի» պաշտպան Խավիեր Ձանետին:
«Ես նրան հանդիպել եմ դեռեւս Հռոմի պապ հռչակվելը: Նա համեստ մարդու տպավորություն թողեց եւ շատ սիրված է ժողովրդի կողմից: Ես եւ իմ ընտանիքը կրկին կցանկանայինք հանդիպել նրա հետ» - ասել է 40-ամյա ֆուտբոլիստը:
