Գարի Կասպարովը մարզում է Նակամուրային
Շախմատի աշխարհի 13-րդ չեմպիոն Գարի Կասպարովը New In Chess ամսագրի իր սյունակում գրել է, որ համագործակցում է ԱՄՆ-ի շախմատիստ Հիկարու Նակամուրայի հետ, եւ որ արդեն մի քանի անհատական պարապմունքներ է անցկացրել:
«Ես հնարավորություն եմ ունեցել աշխատելու նորվեգացի շախմատիստ Մագնուս Կառլսենի հետ: Այս տարի մի քանի անգամ մարզել եմ Նակամուրային, սակայն դա պաշտոնական չի եղել» - ասել է Կասպարովը:
Նրա կարծիքով, ինչպես եւ ճապոնական ծագում ունեցող գրոսմայստերը, Կառլսենը նույնպես մեծ տաղանդ ունի: Սակայն աշխարհի նախկին չեմպիոնին մտահոգում է այն, որ ամերիկացին անտարբեր չէ թղթախաղերի հանդեպ, ինչը կարող է խանգարել նրա շախմատային առաջընթացին:
Հիկարու Նակամուրան հաստատել է Գարի Կասպարովի հետ համագործակցելու փաստը` նշելով, որ շախմատի մասին իր պատկերացումներն ու հայացքները գնալով ավելի շատ են համընկնում աշխարհի 13-րդ չեմպիոնի պատկերացումների ու հայացքների հետ:
