Ռազմիկ Վարդանյանը հաղթում է բիլիարդում
Ուկրաինայի մայրաքաղաք Կիեւում մեկնարկել է բիլիարդի աշխարհի 12-րդ առաջնությունը: Մրցաշարին մասնակցելու հայտ են ներկայացրել 21 երկրների 140 բիլիարդիստներ:
Կանանց մրցումներում Հայաստանը ներկայացնում են Սվետլանա Մաքսիմովան եւ Օլգա Պրոխորովան, որոնք արդեն առաջին փուլում պարտվել են եւ դուրս մնացել պայքարից: Սվետլանան զիջել է ուկրաինուհի Զարյանա Պրիտյուլիկին` 1:4, իսկ Օլգան` Տատյանա Մելիխովային` 0:4:
Տղամարդկանց առաջնությունում Արմեն Գաբրիելյանը առաջին մրցախաղում 5:2 հաշվով հաղթել է ադրբեջանցի Ֆազիլ Մամեդովին, սակայն երկրորդում պարտվել է ռուսաստանցի Լիվադային` 2:5, եւ ավարտել ելույթները:
Մեր երկրորդ մասնակիցը՝ Ռազմիկ Վարդանյանը հաջող է սկսել աշխարհի չեմպիոնի կոչման համար պայքարը: Առաջին մրցամարտում նա պարզապես ջախջախեց ֆինն բիլիարդիստ Յանե Պեկոլային` 5:0: Երկրորդ խաղում մեր մարզիկը ուժերը կչափի ռուսաստանցի Կիրիլ Ֆիլիպովի հետ:
