Աշխարհի չեմպիոնը չի՞ տեսնի Հայաստանը
Բուլղարիայի ֆուտբոլի հավաքականի գլխավոր մարզիչ Լոթար Մաթեուսը հայտարարել է, որ չի պատրաստվում հրաժարական տալ եւ մտադիր է թիմը ղեկավարել մինչեւ 2013 թվականի վերջը:
«Ես բանավոր համաձայնության եմ եկել Բուլղարիայի ֆուտբոլի ֆեդերացիայի նախագահ Բորիսլավ Միխայլովի հետ` իմ պայմանագիրը երկարաձգելու համար, - Focus.de կայքէջին տված հարցազրույցում նշել է գերմանացի մասնագետը, - Չեմ կասկածում, որ ֆեդերացիայի նախագահը իր խոսքի տերը կմնա»:
Սակայն Եվրո-2012-ի ընտրական փուլում Բուլղարիայի հավաքականի կրած երկու պարտությունից հետո այդ երկրում սկսել են անընդհատ խոսել Լոթար Մաթեուսի պաշտոնանկության մասին: Ավելին, ֆեդերացիայի գործկոմի երկու անդամները պահանջել են հրաժարվել գերմանացու ծառայություններից:
Ըստ բուլղարական լրատվամիջոցների՝ ԲՖՖ-ի նախագահը առաջիկա օրերին պատրաստվում է հանդիպել գործկոմի անդամների հետ` պարզելու նրանց դիրքորոշումն այդ հարցում:
Հիշեցնենք, որ Բուլղարիայի ընտրանին Հայաստանի հավաքականի մրցակիցներից մեկն է աշխարհի 2014 թ առաջնության ընտրական փուլում, ուստի եթե Լոթար Մաթեուսը պաշտոնանկ արվի, ապա աշխարհի 1990 թ չեմպիոնը կզրկվի Հայաստանը տեսնելու հնարավորությունից:
