Ջերմուկում մեկ գիշերվա համար 150 հազար դրամ են պահանջում. Aravot.am
Աջակցիր «Ա1+»-ինԳյումրու տուրիստական ընկերություններից մեկի հիմնադիր տնօրեն Գոռ Թորոսյանն Aravot.am-ի հետ զրույցում ասաց, որ շոգ եղանակներին, այսպես ասած՝ ծովի սեզոնին, գյումրեցիների նախընտրած հանգստավայրը Քոբուլեթին է։
«Անցած տարվանից մինչ այս պահն ամենամեծ հետաքրքրությունը ներկայացնում է Քոբուլեթին։ Նրանք նախընտրում են Քոբուլեթին, բայց ոչ Բաթումին, քանի որ Քոբուլեթին Բաթումիի հետ համեմատ ավելի մատչելի է։
Իհարկե՝ Վրաստանից հետո երկրորդ տեղում Եգիպտոսն է։ Այն բնականաբար արժեքով ավելի բարձր է, բայց և այնպես մնում է պահանջված։ Ֆինանսական հնարավորություններ ունեցողները Մալդիվներ, Շրի Լանկա և այլ վայրեր են գերադասում։
Պիտի ասեմ, որ Շիրակի մարզը յուրօրինակ է, մարդիկ գնում են հանգստի՝ ոչ թե հաշվի առնելով վայրը, ծառայությունների որակը, այլ արժեքը։ Իհարկե, դա լավ օրից չի գալիս», -ասաց մեր Գոռ Թորոսյանը։
Մեր զրուցակցի ասելով, մինչև հուլիսի 10-ը մեկ հոգու մեկշաբաթյա հանգիստը Քոբուլեթիում կարժենա 50-60 հազար դրամ։
Գոռ Թորոսյանը նշում է, որ Հայաստանի ներսում անտրամաբանական թանկ գներ են սահմանված, մեր երկիր այցելողները, ծանոթանալով գներին, շատ դեպքերում հրաժարվում են գալ։
«Այս պահին Ռուսաստանի Դաշնությունից երկու ընտանիք են հետաքրքրված Հայաստանով, բայց գներն այնքան աստղաբաշխական են, որ չենք կարողանում ամրագրում կատարել։
7 հոգի են, որոնցից 4-ը մեծահասակ են, 3-ը՝ երեխաներ, Ջերմուկում մեկ գիշերվա համար 150 հազար դրամ են պահանջում, ընդ որում առանց նախաճաշի։ Թողնես վիճակագրական վարչությունը ուռճացված թվեր հրապարակի, իրականում չկա պետական վերահսկողություն, ում խելքին ինչ գին փչի, սահմանում է։
Պատկերացրեք 150 հազար դրամով երկու հոգի Քոբուլեթիում մեկ շաբաթով կարգին հանգիստ կվայելի։ Գյումրիում մեկ գիշեր մնալու համար նվազագույնը 40-50 հազար դրամ է պետք, հետաքրքրվեցինք՝ 40 հազար դրամանոցը ընդհանրապես զուրկ էր հարմարություններից, մնալու տեղ չէր, 50 հազարանոցն էլ կարելի էր յոլա տանել։
Փաստորեն այս քաղաքում էլ 70-80 հազար դրամ է պետք, որ կարողանաս նորմալ պայմաններում մնալ։ Ընդ որում մեր հյուրերը գիշերը ժամը 1-ին պիտի հասնեն տեղ, առավոտյան 6-ին հեռանան։
Այցելուները իմանում են այս գները, ուղղակի փախչում են մեր երկրից, իրենք ևս հետաքրքրվեցին, ծանոթացան գներին, համոզվեցին, որ այդպես է, ինձ նամակ էին գրել, թե ի՞նչ է Հայաստանը Ինդոնեզիա՞ է, թե՞ Շրի Լանկա, եթե այդպես է, կես գնով կգնանք ծովափնյա երկիր, օրինակ՝ Վրաստան։
Իհարկե, այսպիսի պայմաններում գուցե հետաքրքրվողներից 1-2-ը գան, բայց 7-8 հոգին հաստատ կհրաժարվեն մեր երկիր այցելել։
Այստեղ լուրջ անելիք կա, մենք պոտենցիալն ունենք, բայց գլխիվայր շուռ ենք տալիս ամեն բան․ փոխանակ կայուն դարձնենք զբոսաշրջությունը, որ բոլոր հետաքրքրվողները գան, հույսներս դրել ենք այդ 1-2 հոգու վրա»,- ասում է Գոռ Թորոսյանը։
Առավոտ
