Եվրադատարանի որոշումը՝ մի քանի օրից․ նախկին դատավորն ընդդեմ ՀՀ-ի
Աջակցիր «Ա1+»-ինԴեկտեմբերի 6-ին Մարդու իրավունքների եվրոպական դատարանը որոշում կհրապարակի ընդդեմ Հայաստանի Հանրապետության։ Այս դեպքում դիմումատուն Ավան և Նոր Նորք վարչական շրջանների ընդհանուր իրավասության նախկին դատավոր Սամվել Մնացականյանն է։ 2011թ հուլիսին նա ազատվել է պաշտոնից, իսկ պաշտոնանկ անելու հիմք դարձել էր նրա մի որոշումը՝ պատճառաբանությամբ, որ պատշաճ հիմնավորված չէր։
2011թ. մայիսի 30-ին դատավոր Մնացականյանը բավարարել էր մեղադրյալ Ալբերտ Խաչատրյանի պաշտպանի միջնորդությունը, նրա նկատմամբ կիրառված կալանավորումը փոխարինել էր գրավով:
Սամվել Մնացականյանը գանգատ է ներկայացրել Եվրադատարան՝ ՄԻ կոնվենցիայի մի քանի իրավունքի խախտման հիմքով՝ 6-րդ հոդվածի (արդար դատաքննություն), 10-րդ հոդվածի (արտահայտվելու ազատություն), 14-րդ հոդվածի (խտրականության արգելում)։
Նախկին դատավորը, մասնավորապես, պնդում է, որ իրեն արգելվել է մուտք գործել դատարան, աշխատանքից ազատումը ոտնահարում է իր խոսքի ազատությունը, և որ իշխանությունների գործողությունները եղել են խտրական: