ՀՀ ոստիկանության պետի տեղակալ Արամ Հովհաննիսյանին շնորհվել է գեներալ-մայորի կոչում

Երեկ՝ հուլիսի 4-ին, Հանրապետության նախագահի հրամանագրով ՀՀ ոստիկանության պետի առաջին տեղակալ, ոստիկանության գնդապետ Արամ Հովհաննիսյանին շնորհվել է ոստիկանության գեներալ-մայորի կոչում։ 

Համապատասխան հրամանագրում ասվում է. 

Հիմք ընդունելով վարչապետի առաջարկությունը՝ համաձայն Սահմանադրության 133-րդ հոդվածի 2-րդ մասի, ինչպես նաև «Ոստիկանությունում ծառայության մասին» օրենքի 5-րդ հոդվածի 2-րդ մասի՝ Հայաստանի Հանրապետության ոստիկանության պետի առաջին տեղակալ, ոստիկանության գնդապետ Արամ Կառլենի Հովհաննիսյանին շնորհել ոստիկանության գեներալ-մայորի կոչում:

Արամ Կառլենի Հովհաննիսյան ծնվել է 1966 թ. նոյեմբերի 7-ին, Արտաշատ քաղաքում:

1993թ. ավարտել է Ֆիզիկական կուլտուրայի հայկական պետական ինստիտուտը:

1985-1987 թթ. ծառայել է զինված ուժերում:

1990-1991 թթ. եղել է Արտաշատի ներքին գործերի բաժնի պարեկապահակետային ծառայության միլիցիոներ:

1991թ. ազատվել է ՆԳ մարմիններում ծառայությունից:

1993-2000 թթ. եղել է Արտաշատի ՆԳ բաժնի քրեական հետախուզության բաժանմունքի օպերլիազոր:

2000-2002 թթ. եղել է Արտաշատի ՆԳ բաժնի անչափահասների գործերով բաժանմունքի ավագ օպերլիազոր:

2002-2007 թթ. եղել է ՀՀ ոստիկանության Արարատի մարզային վարչության Մասիսի բաժնի քրեական հետախուզության բաժանմունքի պետ:

2007-2008 թթ. եղել է ՀՀ ոստիկանության Արարատի մարզային վարչության Արտաշատի բաժնի պետի օպերատիվ գծով տեղակալ:

2008-2012 թթ. եղել է ՀՀ ոստիկանության Արարատի մարզային վարչության Արտաշատի բաժնի պետ:

2012-2014 թթ. եղել է ՀՀ ոստիկանության Արմավիրի մարզային վարչության Արմավիրի բաժնի պետ:

2014-2016 թթ. եղել է ՀՀ ոստիկանության Երևան քաղաքի վարչության Շենգավիթի բաժնի պետ:

2016-2018 թթ. եղել է ՀՀ ոստիկանության Երևան քաղաքի վարչության Կենտրոնական բաժնի պետ:

2018-2019 թթ. եղել է ՀՀ ոստիկանության Կոտայքի մարզային վարչության պետ:

12.06.2019-17.09.2019 թթ. եղել է ՀՀ ոստիկանության Արմավիրի մարզային վարչության պետի պաշտոնակատար:

17.09.2019-08.07.2020 թթ. եղել է ՀՀ ոստիկանության Արմավիրի մարզային վարչության պետ:

ՀՀ նախագահի 08.07.2020 թ. հրամանագրով նշանակվել է ՀՀ ոստիկանության պետի առաջին տեղակալի պաշտոնին:

Պարգևատրվել է՝

ԼՂՀ Նախագահի հրամանագրով՝ 2002 թ. Մարտական ծառայության մեդալով:

ՀՀ Նախագահի հրամանագրերով՝ 2010 թ. Մարտական ծառայության մեդալով, 2016 թ. «Հասարակական կարգի գերազանց պահպանման համար» մեդալով:

Պարգևատրվել է նաև ՀՀ ոստիկանության և այլ գերատեսչությունների մեդալներով և կրծքանշաններով:

Ամուսնացած է, ունի երեք որդի: