«Փյունիկ»-ը չեմպիոն
Այսօր ավարտվեց ֆուտբոլի Հայաստանի 19-րդ առաջնության բարձրագույն խմբի մրցաշարը:
Առաջին տեղում ընթացող Երեւանի «Փյունիկը» հյուրընկալվելիս ի հաշիվ Մարկոս Պիզելիի խփած միակ գոլի հաղթեց Երեւանի «Կիլիկիային»` 1:0, եւ 10-րդ անընդմեջ, իսկ ընդհանրապես 13-րդ անգամ նվաճեց հանրապետության չեմպիոնի կոչումը:
Խաղից հետո «Փյունիկի» գլխավոր մարզիչ Վարդան Մինասյանն ասաց, որ թիմի հերթական հաջողությունը հիմնականում ֆուտբոլիստների շնորհիվ ձեռք բերվեց: «Թող ինքնագովազդ չհնչի, սակայն «Փյունիկն» ավելի արժանի էր չեմպիոնի կոչմանը, քանի որ վերջին 4 խաղերում հենց մեր թիմը բոլորից լավ հանդես եկավ եւ հաղթանակներ տարավ», - եզրակացրեց նորընծա չեմպիոնի գլխավորը:
2010 թվականի արծաթե մեդալակիր դարձավ Երեւանի «Բանանցը», որը Իջեւանում 2:1 հաշվով հաղթեց «Շիրակին»: Երկրորդ տարին անընդմեջ երրորդ մրցանակային տեղը զբաղեցրեց Երեւանի «Ուլիսը», որը վերջին խաղում կամային հաղթանակ տոնեց «Միկայի» նկատմամբ` 3:2: «Գանձասար» - «Իմպուլս» խաղն ավարտվեց դաշտի տերերի հաղթանակով` 1:0:
Ամփոփիչ աղյուսակ
Թիմեր Խ Գ Մ
1. Փյունիկ 28 73-22 65
2. Բանանց 28 58-24 64
3. Ուլիս 28 44-23 55
4. Միկա 28 47-31 46
5. Իմպուլս 28 29-43 37
6. Գանձասար 28 24-45 27
7. Կիլիկիա 28 19-60 15
8. Շիրակ 28 22-68 10
