Բացել լրահոսը Փակել լրահոսը
A A
Քաղաքականություն

«Մենք խոսում ենք 5000 զոհերի մասին, իսկ ի՞նչ ծրագիր ենք արել, որ էդ 5000 ժողովրդագրական  բացը լրացնենք»․ Թեւան Պողոսյան (տեսանյութ)

 

ԵԽԽՎ-ն  երեկ  ընդունեց Լեռնային Ղարաբաղի հակամարտության հումանիտար հետևանքների վերաբերյալ բանաձեւ, որում  ամրագրված են Ադրբեջանի որոշ  պարտավորություններ։  Մասնավորապես՝  ԵԽԽՎ-ն կոչ է անում Ադրբեջանի իշխանություններին ազատ արձակել բոլոր գերիներին և առանց հետաձգման վերադարձնել նրանց Հայաստան։

«Այն օրը, երբ տեղի ունենան սանկցիաներ, որ  Ադրբեջանը կզգա ցավ,ապա այո, բայց այդ սանկցիաները ԵԽԽՎ-ն չի կարողանալու կիրառի, պետք է  երկրները կիրառեն։ Ասեն, օրինակ,  հետևում ենք Հայաստանի Հանրապետության օրինակին՝ ճանաչում ենք Արցախի անկախությունը։ Բայց դրա համար Հայաստանի Հանրապետությունը պետք է օրինակ ծառայի, չէ՞»,-ասում է  Մարդկային զարգացման միջազգային կենտրոնի Թևան Պողոսյանը։

Նրա խոսքով՝ եթե դա մի փաստաթուղթ է, որ կրկնում է նախկին սխալները  և այնտեղ  հասցեական չկա,  թե ո՞վ է տարածաշրջանում պրոբլեմը ձևավորել, ապա ինչի՞ մասին կարող է խոսք լինել․

«Ալևս մենք էլ մեր վարքագիծը պետք է փոխենք, թույլ չտանք այդ  երկերեսանի քաղաքականության  խնդիրները, ամեն բառն ավելի ճիշտ ու ուղիղ հասկանանք՝ դրանց մեկնաբանությունների իմաստով»։

Ըստ նրա՝  Հայաստանը պետք է բացառապես հայկական շահով առաջնորդվի  և  կոնկրետ գործողություններ անի, որպեսզի ցանկացած  փաստաթուղթ դառնա իրականություն․ «Եթե մենք չձևավորենք մեր  ազգային պետական ինքնության ընկալումը մեր մեջ, մենք այդպես էլ պետություն չենք դառնալու»։

Ի թիվս այս հարցերի Մարդկային զարգացման միջազգային կենտրոնի ղեկավարը պակաս կարևոր չհամարեց ժողովրդագրության խնդիրը․ «Մենք խոսում ենք 5000 զոհերի մասին, իսկ ի՞նչ ծրագիր ենք արել, որ էդ 5000 ժողովրդագրական  բացը լրացնենք»։

Նա նշեց, որ պետությունն  պետք է այնպիսի ծրագրեր մշակի և առաջարկի, որ  թե նորաստեղծ, և  թե՛ արդեն երեխա ունեցող  ընտանիքներում շատ երեխաներ ծնվեն։ Միայն այդպես պետությունը կկարողանա լրացնել այն ժողովրդագրական բացը, որը ստեղծվել է պատերազմի, ապա նաև՝ հետպատերազմյան արտագաղթի հետևանքով։