Աղամալյանը բացահայտեց … Աղամալյանին
Այն, որ Հայաստանի ձյուդոյի ֆեդերացիայում այժմ լուրջ խմորումներ են, ապացուցեց երեկ «Ա1+»-ի խմբագրությունում հնչած հեռախոսազանգը:
Հեռախոսի հակառակ կողմում գտնող անձնավորությունը, ներկայանալով որպես ՀՁՖ-ի փոխնախագահ Գագիկ Աղամալյան, պահանջեց հերքել հոկտեմբերի 1-ին տպագրված այն լուրը, որ ինքն իբր ասել է, որ «Հայաստանի ձյուդոյի ֆեդերացիայի նախագահ Ալեքսան Ավետիսյանը հրաժարական չի տվել: Նման լուրերը չեն համապատասխանում իրականությանը»:
Սակայն փաստն այն է, որ Ալեքսան Ավետիսյանը մինչ այսօր դեռ չի ներկայացրել իր հրաժարականը, ուստի հարց է ծագում, թե ինչը պետք է հերքվի:
Բայց այդ հեռախոսազրույցից պարզվեց, որ հոկտեմբերի 1-ին մեր մարզական լրագրողի զանգին Ձյուդոյի ֆեդերացիայից պատասխանած անձնավորությունը ամենեւին էլ չի եղել ՀՁՖ-ի փոխնախագահ Գագիկ Աղամալյանը (իսկ մեզ հենց այդ անուն ազգանունով էր ներկայացել ֆեդերացիայի ներկայացուցիչը):
«Ես այդ պահին «Դինամո» մարզադահլիճում մարզում էի անցկացնում երեխաների հետ, ուստի չէի կարող գտնվել ֆեդերացիայում», - հեռախոսով հայտնեց փոխնախագահը:
