Էլինա Դանիելյանը դարձավ Եվրոպայի կանանց չեմպիոն

Էլինա Դանիելյանը շախմատի Եվրոպայի կանանց չեմպիոն է դարձել Ռումինիայի Յասի քաղաքում ավարտված առաջնությունում:

Այսօր կայացած վերջին` 11-րդ տուրում, մեր շախմատիստուհին սպիտակ խաղաքարերով վստահ հաղթեց էստոնուհի Մաի Նարվային, վաստակեց 9 միավոր և միանձնյա գրավեց 1-ին տեղը, քանի որ նրա հետ համաքայլ ընթացող Յուլյա Օսմակը ոչ-ոքի ավարտեց իր պարտիան և կես միավորով ետ մնաց: 

Մրցանակային 2-րդ հորիզոնականը գրավեց հենց ուկրաինուհի գրոսմայստերը, իսկ 3-րդ տեղը զբաղեցրեց լեհ շախմատիստուհի Օլիվյա Կիոլբասան, որը լրացուցիչ գործակիցներով առաջ անցավ նույնպես 8 միավոր վաստակած Նատալյա Բուկսայից:

Հայաստանը ներկայացնող գրոսմայստեր Աննա Սարգսյանը ընթացիկ տուրում հաղթեց սլովենցի Լաուրա Ունուկին, վաստակեց 7,5 միավոր և զբաղեցրեց պատվավոր 5-րդ տեղը:

Հավելենք, որ շախմատի Եվրոպայի կանանց առաջնության գլխավոր մրցավարն էր հայաստանցի միջազգային մրցավար Աշոտ Վարդապետյանը: Առաջնության մրցանակային հիմնադրամը կազմում է 60 հազար եվրո:

Շախմատի Եվրոպայի կանանց անհատական առաջնությունն անցկացվում է 2000 թվականից:

Ահա Եվրոպայի բոլոր չեմպիոնների և հայաստանցի մրցանակակիրների ցուցակը

2000 թ` Նատալյա Ժուկովա (Ուկրաինա)

2001 թ` Ալմիրա Սկրիպչենկո (Մոլդովա)

2002 թ` Անտոանետա Ստեֆանովա (Բուլղարիա),  2  Լիլիթ Մկրտչյան

2003 թ` Պիա Կրամլինգ (Շվեդիա)

2004 թ` Ալեքսանդրա Կոստենյուկ (Ռուսաստան)

2005 թ` Կատերինա Լահնո (Ուկրաինա)

2006 թ` Եկատերինա Աթալիկ (Թուրքիա),  3. Լիլիթ Մկրտչյան

2007 թ` Տատյանա Կոսինցևա (Ռուսաստան)

2008 թ` Կատերինա Լահնո (Ուկրաինա)

2009 թ` Տատյանա Կոսինցևա (Ռուսաստան),  2. Լիլիթ Մկրտչյան

2010 թ` Պիա Կրամլինգ (Շվեդիա)

2011 թ` Վիկտորյա Չմիլիտե (Լիտվա),  3. Էլինա Դանիելյան

2012 թ` Վալենտինա Գունինա (Ռուսաստան)

2013 թ` Հոան Թան Թրան (Հունգարիա),  3. Լիլիթ Մկրտչյան

2014 թ` Վալենտինա Գունինա (Ռուսաստան)

2015 թ` Նատալյա Ժուկովա (Ուկրաինա)

2016 թ` Աննա Ուշենինա (Ուկրաինա)

2017 թ` Նանա Ձագնիձե (Վրաստան)

2018 թ` Վալենտինա Գունինա (Ռուսաստան)

2019 թ` Ալինա Կաշլինսկայա (Ռուսաստան)

2021 թ` Էլինա Դանիելյան (Հայաստան)