13-րդ անգամ
Այսօր Երեւանի «Հանրապետական» մարզադաշտում 13-րդ անգամ կխաղարկվի հայկական ֆուտբոլի երախտավոր Հակոբ Տոնոյանի անվան Սուպերգավաթը:
Միմյանց հետ կհանդիպեն հանրապետության չեմպիոն Երեւանի «Փյունիկը» եւ այս տարվա գավաթի խաղարկության եզրափակիչ խաղի մասնակից Երեւանի «Բանանցը»: Խաղի սկիզբը ժամը 17:00-ին է:
Հարկ է նշել, որ վերջին տարիներին Սուպերգավաթի խաղարկումը կորցրել է իր վարկանիշը: Մասնավորապես` անցած տարի գավաթին տիրեց Երեւանի «Արարատը», որը Հայաստանի առաջնությունում զբաղեցնում էր վերջին տեղը: Իսկ պատճառն այն էր, որ Երեւանի «Փյունիկն» այդ խաղին ներկայացել էր երկրորդ կազմով:
Թե ինչ կազմերով կներկայանան այսօր թիմերը, դժվար է ասել, քանի որ դրանց մարզիչներն այժմ ավելի շատ մտածում են երկրի առաջնության վերջնամասի հաջող անցկացման մասին:
Հավելենք, որ Սուպերգավաթը մինչ այսօր նվաճել են «Փյունիկը»` 6, «Շիրակը»` 3, «Ցեմենտը», «Միկան» եւ «Արարատը»` 1-ական անգամ:
