ԵԱՀԿ դիտորդական առաքելության 9 պետություններից Հայաստան ժամանած փորձագետները հսկում էին խորհրդարանական արտահերթ ընտրությունները։ Առաքելության ղեկավարող Օուեն Մերֆին նշեց, որ իրենք մեկ ամսից ավելի է՝ Հայաստանում են, հետևել են նաև նախընտրական քարոզարշավին ու դեռևս որոշ ժամանակ մնալու են այստեղ՝ ուսումնասիրելու, թե ինչպես են վերջնական տեսքի բերվում ընտրության արդյունքները, բողոքարկումները։

«Մեզ համար այս ամբողջ ընթացքում խոչընդոտներ չեն առաջացել, իշխանությունները բաց, թափանցիկ կերպով մեզ հետ համագործակցել են, մենք համագործակցել ենք քաղաքացիական հասարակության ներկայացուցիչների, կուսակցությունների ներկայացուցիչների հետ և գրեթե բոլոր ոլորտներում պրոֆեսիոնալ աշխատանքի ենք հանդիպել», - ասաց Մերֆին։

Նա շեշտեց, որ դիտորդական առաքելությունն իր աշխատանքը կատարել է անկողմնակալ, արդար։ Ընտրությունների օրը նրանք ընդհանուր առմամբ գնահատել են դրականորեն, թեև որոշ ընտրատեղամասերում մեծ կուտակումներ էին ու մարդկանց թիվը գերազանցել է օրենքով սահմանված քանակը։

«Ագրեսիվ, անձնավորված, որոշ դեպքերում թշնամական վերաբերմունքը միգուցե խաթարել է այն կառուցողականությունը, որ կարելի էր ակնկալել նման ընտրությունների կազմակերպման ընթացքում»,-ասաց Մերֆին։

Ընտրակաշառքների վերաբերյալ հարցին ի պատասխան էլ նա նշեց, որ նման դեպքերի մասին լսել են և աընդունելի են համարում այդ չարաշահումները, սակայն կարևորն այն է, որ իշխանությունը համապատասխան ընթացք է տվել այդ մեղադրանքներին և ենթադրություններին․ այդ ամենը տեղ կգտնի իրենց արձանագրություններում։

Նշենք, որ ընդհանուր առմամբ առաքելության կազմում ներկայացված են՝ 353 դիտորդներ 37 երկրներից, այդ թվում ՝ ԺՀՄԻԳ-ի կողմից տեղակայված 249 փորձագետներ, երկարաժամկետ և կարճաժամկետ դիտորդներ, 80 խորհրդարանականներ և աշխատակազմի անդամներ ԵԱՀԿ ԽՎ-ից, ինչպես նաև 24 անձ ԵԽԽՎ-ից :