Արցախի ԱԺ նախագահը շնորհակալագիր է հանձնել Ավետարանչական ընկերակցության տնօրենին
Աջակցիր «Ա1+»-ինՄայիսի 26-ին Արցախի Հանրապետության Ազգային ժողովի նախագահ Արթուր Թովմասյանն ընդունել է Ամերիկայի Հայ Ավետարանչական ընկերակցության պատվիրակությանը՝ գործադիր տնօրեն Զավեն Խանջյանի գլխավորությամբ: Այս մասին հայտնում են ԱՀ ԱԺ լրատվության և հանրության հետ կապերի բաժնից։
Հանդիպմանն Արթուր Թովմասյանն անդրադարձել է պատերազմական և ետպատերազմյան իրողություններին: Պատերազմի ծանր օրերին Ամերիկայի Հայ Ավետարանչական ընկերակցությունը Արցախի կողքին էր: Ի նշան երախտագիտության Արթուր Թովմասյանը Զավեն Խանջյանին է հանձնել Ազգային ժողովի շնորհակալագիրը:
Հայ Ավետարանչական ընկերակցությունը կշարունակի իր աջակցությունը Արցախին՝ հավաստիացրել է Զավեն Խանջյանը: Կազմակերպությունը նախատեսում է ներդրումներ՝ ուղղված մատաղ սերնդի կրթությանն ու դաստիարակությանը:
Հանդիպմանը ներկա էր Ազգային Ժողովի գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արամ Հարությունյանը:
