Հայաստանի չորս մարմնամարզիկներ կպայքարեն եվրոպական մեդալների համար (տեսանյութ)
Աջակցիր «Ա1+»-ինՇվեյցարիայի Բազել քաղաքում ընթացող մարմնամարզության Եվրոպայի առաջնությունում այսօր պայքարի մեջ մտան տղամարդիկ:
Հայաստանից մրացաշարին մասնակցում են հինգ մարմնամարզիկ: Բազմամատում մերոնցից լավագույն արդյունք ցույց տվեց Գագիկ Խաչիկյանը, որը 77.299 միավորով զբաղեցրեց 33-րդ տեղը:
Մեր մարմնամարզիկները, սակայն, հաջող հանդես եկան առանձին գործիքների վրա: Նժույգթափի մրցումներում Գագիկ Խաչիկյանը գրավեց 3-րդ, իսկ Արթուր Դավթյանը` 4-րդ տեղը: Նրանք մտել են եզրափակիչ և կշարունակեն պայքարը մեդալների համար:
Օղակների մրցաշարում վստահ հանդես եկան Վահագն Դավթյանն ու Արթուր Ավետիսյանը, որոնք զբաղեցրին համապատասխանաբար 2-րդ և 4-րդ տեղերը: Նրանք նույնպես մտել են եզրափակիչ փուլ:
Հենացատկում եվրոպական մեդալների համար կպայքարի Արթուր Դավթյանը, որը որակավորման մրցումներում ցույց է տվել 4-րդ արդյունքը:
Եզրափակիչ փուլի մրցաշարերը տեղի կունենան ապրիլի 24-ին և 25-ին: