ՀՀ վարչապետ Նիկոլ Փաշինյանի Սյունիք այցից ու այնտեղ մարդկանց իրականացրած ակցիաներից ու ընդվզումներից հետո այսօր բազմաթիվ սյունեցիներ են բերման ենթարկվել և այժմ Քննչական կոմիտեում են, այդ թվում՝ Մեղրի համայնքի ղեկավար Մխիթար Զաքարյանը։

 

Բերման ենթարկված քաղաքացիների կողմնակիցներն ու տարբեր քաղաքական ուժերի ներկայացուցիչներ հավաքվել էին ՔԿ-ի դիմաց ու ակցիա էին իրականացնում՝ պահանջելով ազատ արձակել նրանց, քանի որ, ըստ իրենց, այդ մարդիկ ոչ մի խուլիգանություն չէին իրականացրել։

 

Ազգային ժողովի պատգամավոր Գևորգ Պետրոսյանն ասաց, որ դատավարական հսկողություն իրականացնող դատախազության աշխատակիցները պետք է հասկանան, որ իրենք քաղաքական պատվեր են կատարում․

 

«Սա բացառապես քաղաքական հետապնդում է, հակառակ դեպքում, ես հարց եմ տալիս իրավապահ մարմիններին՝ եթե համ Մեղրիի քաղաքապետն է հանցագործ, համ Գորիսի, բա ինչի՞ էին այդ մարդիկ ազատության մեջ մինչև հիմա։ Թե՞ պիտի Նիկոլ Փաշինյանը գնար, խայտառակ լիներ, նոր որոշեին, որ քաղաքապետերը հանցագործ էին», - ասաց նա։

Լրագրողը հիշեցրեց, որ «Իմ քայլի» պատգամավոր Արփի Դավոյանը հայտարարել էր՝ «Այդ Սյունիքում ոչ ոք անպատիժ չի մնա», Գևորգ Պետրոսյանն արձագանքեց․ «Արփի Դավոյանն ու իր նմանները շփոթված են իրենց կարգավիճակով։ Արփի Դավոյանն ի՞նչ գործ ունի Ազգային ժողովում։ Ոնց որ ես հիմա գնամ, գինեկոլոգների կոնֆերանս վարեմ, կլինի՞ նման բան»։

 

ՀՅԴ կուսակցության անգամ Գեղամ Մանուկյանն ասաց, որ Երևանում համակարգչի առաջ նստած «փափկասուն» մարդիկ ասում են՝ երեկ հայհոյել են, բայց այդ մարդիկ պետք է հասկանան մեղրեցու, սյունեցու հոգեվիճակը, որը մտածում է՝ այս իշխանությունը վաղը բերելու է նրան, որ ադրբեջանցին ու թուրքը կարողանալու են իրենց հողերում ել ու մուտ ունենալ, բնականաբար արձագանքն այդպիսին կլիներ։

 

Որոշ ժամանակ անց Քննչական կոմիտեի բակում միջադեպ տեղի ունեցավ նախ Գևորգ Պետրոսյանի ու ոստիկաններից մեկի, այնուհետև ԱԺ նախկին պատգամավոր Արման Սաղաթելյանի ու իրավապահների միջև։

 

Երկու դեպքում էլ Գևորգ Պետրոսյանն ու Արման Սաղաթելյանը բողոքում էին, որ ոստիկաններից մի քանիսի հագուստին չկային անձնական կրծքանշանները։ Արման Սաղաթելյանը երկար ժամանակ բղավոցներով պահանջում էր փոխգնդապետից հեռացնել առանց տարբերանշանի կանգնած ոստիկաններին։