Մարկեսի «Երկնագույն շան աչքերը»` 25-րդ անգամ Գյումրու Վարդան Աճեմյանի թատրոնում
Աջակցիր «Ա1+»-ինԱրդեն 2 տարի է, ինչ Գյումրու Վարդան Աճեմյանի անվան պետական դրամատիկական թատրոնի հանդիսատեսը վայելում է Գաբրիել Գարսիա Մարկեսի «Երկնագույն շան աչքերը» 1 գործողությամբ դրաման՝ երիտասարդ դերասաններ Արսեն Միքայելյանի և Իննա Խոջամիրյանի անչափ զգացմունքային խաղով։
Բեմադրությունը աճեմյանական թատրոնի համար նոր չէ, պարզապես դերակատարներն են փոխվել՝ ներկայացնելով երազելու, երազն իրականություն դարձնելու ձգտման յուրովի պատկերացումները։ Նոր մեկնաբանությամբ ներկայացումը 25-րդ անգամ գյումրեցի հանդիսատեսին տեղափոխեց սիրահար զույգի երազային աշխարհը, ովքեր հնարավորություն չունեն միմյանց դիպչելու` իրար հպվելու դեպքում երազային սերը կավարտվեր, կչքանար։ Սիրահարները որոշում են երազն իրականություն դարձնել ու գտնել միմյանց իրական կյանքում, սակայն արթնանալիս մոռանում են իրար։ Երազում հանդիպելիս, իրար գտնելու համար գաղտնաբառ են հորինում՝ «Երկնագույն շան աչքեր»՝ փնտրելով այս արտահայտությունը ամենուր․․․
«Առաջին բեմելս եղել է Գյումրու դրամատիկական թատրոնում, ինչը կրկնակի պարտավորեցնող է ինձ համար, և այն փաստը, որ այս ներկայացումով ես բեմին եմ արդեն 25-րդ անգամ, ինձ թույլ է տալիս մտածելու, որ գյումրեցի հանդիսատեսն ինձ ընդունեց -ներկայացման ավարտին ասաց դերասանուհի Իննա Խոջամիրյանը։ Գլխավոր դերակատար Արսեն Միքայելյանն ասում է․ «Դասականի գործ խաղալու ամենակարևոր առանձնահատկությունն այն է, որ այն բոլոր ժամանակների համար է ու ոգևորող շարժիչ ուժ է բոլորի համար, թեման համամարդկային է, ժամանակ չի ճանաչում։ Ինչքան առնչվում ես այսպիսի հոգեվոր խնդիրների հետ՝ այնքան ավելի հեշտ ես ստեղծագործում »։
Ռեժիսոր Ռաֆայել Ասատրյանն էլ հավելում է․ « Բարդ ու երկար ճանապարհ անցած գործ է, հանդիսատեսի վերաբերմունքից ենք զգում, որ այս պիեսը ասելիք ունի իր մեջ, մենք էլ ուզում ենք մոտ մեկ ժամ երազ նվիրել մարդկանց, որ այստեղից դուրս գալուց հետո էլ շարունակեն երազել»։
