Բացել լրահոսը Փակել լրահոսը
A A
Հասարակություն

Ազգային-ժողովրդավարական բևեռը դիմում է փողոցում չգտնվողներին․ ուղիղ (տեսանյութ)

 

«Մեր երկրում սկսվել է ազատ, ժողովրդավարական նոր գործընթաց, քանի որ բանակի ղեկավարությունը անհնազանդություն է հայտնել», - «Ազգային-ժողովրդավարական բևեռ» նախաձեռնության՝ Մատենադարանի մոտ  կազմակերպված հավաքի ընթացքում ասաց  Ժիրայր Սեֆիլյանը։

Նա նշեց, որ խնդիր ունեն՝ կյանքի կոչել ժողովրդի երկար տարիների ցանկությունը։ Մասնավորապես, այս օրերին գերիշխող է այն կարծիքը, որ ժողովուրդը չի ցանկանում տեսնել նախկիններին իշխանության ղեկին և նույնչափ չի ցանկանում այլևս տեսնել ներկաներին։

 «Մենք՝ որպես ուժ, հաճախ փորձել ենք այդ արհեստական սև-սպիտակին զուգահեռ ցույց տալ ազգային, իսկական ուժի ներկայությունը, սակայն տարբեր ձևերով խոչընդոտել են մեզ», - ասաց նա։

Բանակի ճիշտ դիրքավորման շնորհիվ, Սեֆիլյանի խոսքով, իրենց նման ուժերի համար հնարավորություն է բացվել երևալու ժողովրդին։

«Ազգային-ժողովրդավարական բևեռ»-ի նախաձեռնության անդամ Գարեգին Չուգասզյանն ասաց, որ երբ հաճախ դրոններով վերևից նկարում են, թե տարբեր հավաքներին քանի մարդ կա, հարց է առաջանում ՝ մնացած ժողովրդին դրոնով հնարավո՞ր է նկարահանել, որոնք ցույցերին չեն մասնակցում․

«Մենք դիմում ենք այդ ժողովրդին, որոնք չեն մասնակցում այս երկու հանրահավաքներին։ Բոլորս հասկանում ենք, որ մեր ժողովրդի մեծամասնությունը չի գալիս ոչ մեկին։ Հարց ենք տալիս՝ մեր հայրենակիցներին՝ մեր այսօրվա քաղաքական դաշտի այս վիճակը, որը հանգեցրել է փակուղու, արդյո՞ք վտանգ չի ներկայացում ոչ միայն ներքաղաքական իմաստով, այլ արտաքին ուժերի միջամտության իմաստով։ Արդյո՞ք սա դրսից չի հրահրվում, որ արդեն աղետ ունենալով Արցախում՝ հիմա նոր աղետ ունենանք Երևանում», - ասաց Գարեգին Զուգասզյանը։

«Մենք մի մասն ենք հայոց իրական էլիտայի, կներեք այդ խոսքի համար։ Այն խավի, որին ազգը պատրաստում էր առաջնորդելու, ղեկավարելու, իր վրա պատասխանատվություն վերցնելու համար․ մենք մեր կյանքով ենք ապացուցել այդ իրավունքը», - ելույթի ընթացքում ասաց Եվրոպական  կուսակցության նախագահ Տիգրան Խզմալյանը։

«Ազգային-ժողովրդավարական բևեռ» նախաձեռնության անդամ  Արկադի Վարդանյանը ելույթի ընթացքում ասաց, որ Նիկոլ Փաշինյանի կազմակերպած հանրահավաքը բեմադրություն էր։

Նա մեջբերեց ՀՀ չորս ղեկավարների խոսքերը, նշելով՝ առաջին նախագահն ասում էր՝ իրարից պարտք արեք, յոլա գնացեք, երկրորդ նախագահը խորհուրդ էր տալիս թութուն ցանել։ Երրորդ նախագահը, նրա խոսքով, որ երկրորդի երկվորյակն էր, այնքան էր հղփացել, որ 2013թ․ նախագահական ընտրությունների նախաշեմին հայտարարեց՝ ինչքան պետք է, էնքան կխփենք․

«Հիմա եկավ չորրորդը, մի նախադասություն ասաց, որ իր էությամբ ոչնչով չի տարբերվում նախորդից՝ ինչ որ պետք ա, էն էլ բանակցում ենք։ Եվ դրանից հետո ունեցանք այն, ինչ ունենք այսօր։ Մենք բոլորս հավատացել ենք նրան, բայց բոլորիս խաբեց», - ասաց Արկադի Վարդանյանը։

 Դիվանագետ Արա Պապյանն ասաց, որ ինքնիշխան պետություն կառուցելու հարցում կարևոր են արտաքին հարաբերությունները։ Նախորդ պատերազմը, նրա խոսքով, մեր դիվանագիտության պարտությունն էր․

«Մենք չունեցանք դաշնակիցներ։ Դա բացառիկ բան է աշխարհի պատմության մեջ, երբ պետությունը 44 օր կռիվ է անում և չունի դաշնակից և դավաճանվում է մինչև իսկ ստրատեգիական դաշնակցի կողմից», - ասաց նա։

Նա ասաց՝ կարծիք է հնչում, որ կան ուժեր՝ այդ թվում և իրենք, որ Ռուսաստանի դեմ են․

«Մենք Ռուսաստանի դեմ չենք, ընդհակառակը, ամենապրոռուսական ուժերից մեկն ենք, որովհետև մենք ուզում ենք Ռուսաստանի հետ ճիշտ հարաբերություններ հենց նրանց շահերից ելնելով», - ասաց Արա Պապյանը։