Երևանի Արաբկիր վարչական շրջանի Վահագն Դավթյան զբոսայգու մոտից  այսօր մեկնարկեց  վարչապետ Նիկոլ Փաշինյանի հրաժարականի պահանջով «Արժանապատվության երթ» ակցիան: 

Երթը կազմակերպել էին խորհրդարանական և արտախորհրդարանական ընդդիմադիր կուսակցությունները:

Երթի մասնակիցները Երևանի փողոցներով շարժվեցին դեպի Սուրբ Աննա եկեղեցի , իսկ եկեղեցու բակում արդեն  խարույկ վառեցին, որի շուրջ ելույթներ ունեցան․

«Հարենիքի փրկության շարժման» վարչապետի միասնական թեկնածու Վազգեն Մանուկյանը հայտարարեց․

 «Մեր պայքարն իսկապես հայրենիքի համար է, որպեսզի ոտքի կանգնենք ու գնանք առաջ: Նիկոլ Փաշինյան խոչնդոտը պետք է մի կողմ գցել եւ շարունակել գնալ առաջ: Հիմա դուք էլ միկրոֆոնը իրար փոխանցելով փորձեք խորհուրդ տալ, թե ինչ պետք է անել: Մի բան հաստատ է՝ Նիկոլը գնալու է, բոլորը բացի իրենից դա գիտեն: Երբեմն մարդիկ ասում են՝ վճռական գործողություն արեք: Հաշվի առեք, որ վճռական գործողությունն այն է, որ այսպիսի երթերի, հանրահավաքների միջոցով ողջ ժողովուրդը լինելու է մի կողմում, Նիկոլը՝ մյուս կողմում: Մենք դա մինչեւ հաղթանակ կհասցնենք եւ մեր առջեւ խնդիր կկանգնի երբեմն որոշ հարցեր զրոյից բարձրացնել, նորից դառնալ երկիր, հզորանալ, տարածաշրջանում ունենալ ազդեցություն»։

ՀՅԴ ԳՄ ներկայացուցիչ, Հայրենիքի փրկության շարժման համակարգող Իշխան Սաղաթելյանը երթի ընթացքում հորդորեց քաղաքացիներին միանալ արժանապատվության երթին և իր խոսքով՝ փրկել հայրենքը։

Երթի ընթացքում մասնակիցներից մեկը հայտարարեց․ գերիների փոխանակման շրջանակներում հայկական կողմը  Զվարթնոց օդանավակայն է տարել 2014թ-ին խաղաղ բնակչության հանդեպ հանցանք գործած 2 ադրբեջանցու, Ադրբեջանին հանձնելու նպատակով։

ՀՅԴ ԳՄ ներկայացուցիչ Արծվիկ Մինասյանը իր հերթին պնդեց,  թե Նիկոլ Փաշինյանը պատրաստ է նոր զիջումների․

«Յուրաքանչյուր օր նոր կորուստներ են սպասվում մեր երկրին։ Սիրելի սփյուռքահայեր, այսօր դուք էլ եք դավաճանված, որովհետև Հայաստանի իշխանությունը գնացել է խայտառակ համաձայնության՝ զիջելով հայոց պետականությունը»,-հայտարարեց նա։

Ընդդիմադիր ուժերի երթն ավարտվեց Սուրբ Աննա եկեղեցու բակում։