Քաղաքական մեծ ակտիվություն չեմ ցուցաբերում. Սերժ Սարգսյան (տեսանյութ)

Ես քաղաքական մեծ ակտիվություն չեմ ցուցաբերում։ Այսօր հրավիրված ասուլիսում հայտարարեց ՍԵրժ Սարգսյանը՝ պնդելով, որ այսօրվա ասուլիսը ևս քաղաքական չի համարում։

Սարգսյանը պնդեց, որ Ապրիլյան քառօրյան և տավուշյան իրադարձությունները համեմատելի չեն, թեև ընդունում է, որ մեր զինուժը լուծել է իր առջեւ դրված կարևոր խնդիր:

Պնդեց, որ նույնը պետք էր անել 2018-ի մայիս-հունիսին Նախիջևանի ուղղությամբ։

Սարգսյանը նաև համոզմունք հայտնեց, որ որևէ մեկը չի կարող ասել, որ մեր զինված ուժերը լավագույնը չեն։ Ինչ վերաբերում է դիրքերի գրավմանը, Սարգսյանն ասաց, որ 1994-ի հրադադարից հետո այդ գործընթացը երբեք կանգ չի առել, բազմաթիվ ուղղություններով մենք ունեցել ենք դիրքային բարելավումներ, պարզապես դա եղել է լուռ եւ առանց աղմուկի։

Ինչ վերաբերում է մեր հետախուզության աշխատանքին 2016 թվականին, Սարգսյանն ասաց, բոլոր հայտարարությունները , թե հարձակման մասին տեղեկատվություն է եղել, հնչեցվել են բոլոր այն մարդկանց կողմից , ովքեր հնարավորություն չեն ունեցել ծանոթանալ այս և դրանից առաջ տրամադրված հետախուզական գործողություններին։

Սարգսյանը պնդեց, որ չեն ունեցել տեղեկատվություն Ադրբեջանի հարձակման մասին եւ որ աշխարհի լավագույն հետախուզական ծառայությունները ևս չեն կարողանում ձեռք բերել ամբողջական տեղեկատվություն:

Սերժ Սարգսյանը չժխտեց, որ այդ հարցում մեր հետախուզությունը թերացել է, օրվա երկրորդ կեսին տեղեկատվություն են ունեցել, որ Ադրբեջանը պատրաստում է դիվերսիոն գործողություն։ Սարգսյանը սահմանափակվեց միայն այսքանով։