Ֆուտբոլի բարձրագույն խումբ, 26-րդ տուր. վճռորոշ օր հյուրընկալվող թիմերի համար
Աջակցիր «Ա1+»-ինՖուտբոլի Հայաստանի բարձրագույն խմբի առաջնության 1-6-րդ տեղերի համար մրցաշարում այսօր կկայանան 26-րդ տուրի բոլոր երեք հանդիպումները:
Հանգամանքների բերումով առաջատար եռյակի թիմերը սեփական դաշտում կընդունեն իրենց հետապնդողներին: Առաջնության երկու առաջատարներից Գյումրիի «Շիրակն» իր հարկի տակ կհյուրընկալի Վանաձորի «Լոռի ՖԱ»-ին: Հյուրերը պարտվելու դեպքում դուրս կմնան չեմպիոնական պայքարից, քանի որ շիրակցիներից արդեն ետ կմնան 8 միավորով:
Մրցաշարի երկրորդ առաջատարը՝ «Արարատ-Արմենիան», սեփական դաշտում կհանդիպի «Ալաշկերտի» հետ: Այստեղ հյուրերը նույնպես նահանջելու տեղ չունեն, սայթաքելու դեպքում ալաշկերտցիները կզրկվեն չեմպիոն դառնալու հնարավորությունից:
Երրորդ տեղում ընթացող «Նոան» իր հարկի տակ կընդունի մրցաշարի ետնապահ «Արարատին»: Արարատցիները տեսականորեն դեռ կարող են զբաղեցնել 3-րդ տեղը, սակայն դրա համար հարկավոր է, որպեսզի «Նոան» պարտություն կրի բոլոր խաղերում, իսկ «Ալաշկերտն» ու «Լոռի ՖԱ»-ն մնացած երեք հանդիպումներում մեկ միավորից ավելի չվաստակեն:
Ինչևէ, այսօր վճռորոշ օր է հյուրընկալվող թիմերի համար, որոնք պարտվելու դեպքում միանշանակ դուրս կմնան մրցանակային տեղերի համար պայքարից:
Մրցաշարային աղյուսակ
- «Շիրակ»՝ 45 միավոր
- «Արարատ-Արմենիա»՝ 45
- «Նոա»՝ 42
- «Ալաշկերտ»՝ 40
- «Լոռի ՖԱ»՝ 39
- «Արարատ»՝ 33