«Էսօր ոնց կարա գյուղացին ոռոգման ջուր ուզենա, ասենք գնա, ապրիլին կգաս». Փաշինյանը՝ Ս․ Բագրատյանին (տեսանյութ)
Աջակցիր «Ա1+»-ինԿառավարությունը ունի՞ հաշվարկ ըստ մարզերի՝ մենք ի՞նչ ենք ցանելու, ի՞նչ ենք ակնկալում, որ գյուղացին արտադրի, ի՞նչ մոտիվացնող ռեժիմներ են կիրառվելու, որպեսզի իրական սեկտորում աշխատող գուղացու համար ներգրավենք միջոցներ, ցանքատարածությունները ավելացնենք,-ԱԺ- Կառավարություն հարցուպատասխանի ժամանակ այս հարցերը վարչապետին ուղղեց ԱԺ ԲՀԿ պատգամավոր Սերգեյ Բագրատյանը:
Բագրատյանի խոսքով՝ սա հենց այն պահն է, որ ամենացածր ռիսկայնություն ունեցող ոլորտում կարող ենք լուրջ տնտեսական արդյունքներ գրանցել:
Բագրատյանի հարցադրումներին ի պատասխան վարչապետ Նիկոլ Փաշինյանն ասաց, որ վաղը Կառավարությունում ընդունվելու է մի ծավալուն փաթեթ, որը վերաբերվելու է բացառապես գյուղատնտեսությանը.
«Ես ասել եմ, որ հիմա գյուղատնտեսությամբ զբաղվելու ամենալավ ժամանակն է և՛ սեզոնի առումով, և՛ արտակարգ դրության, և՛ կորոնավիրուսի առումով, որովհետև դաշտում սոցիալական հեռավորությունը պահելը ավելի հեշտ է, բացի այդ, կանխատեսումներ կան, որ այս ճգնաժամի արդյունքում աշխարհում պարենը ամենապահանջված ապրանքներից մեկն է լինելու»:
Վարչապետն ընդգծեց, որ այս ոլորտում ուզում են զարգացման խնդիր լուծել և գյուղատնտեսության կառուցվածքի մեջ պետք է արվեն էական փոփոխություներ.
«Մենք զրոյացնում ենք գյուղատնտեսության բոլոր վարկերը և, ըստ էության, Կառավարության համաֆինանսավորմամբ առաջարկելու ենք գյուղվարկեր այն ֆերմերներին և անհատներին, ովքեր ունեն վարկային պոզիտիվ պատմություն»:
Ինչ վերաբերում է մարդկանց, ովքեր սև ցուցակներում են, կամ ունեն ոչ այնքան պոզիտիվ վարկային պատմություն, Կառավարությունը նրանց առաջարկում է ստեղծել գյուղատնտեսական կոոպերատիվներ.
«Դրանց ընտրված ղեկավարների համար պատրաստվում ենք դասընթացներ կազմակերպել , հընթացս ապահովել, որ միայն լիցենզավորված մարդիկ կարող են գյուղատնտեսական կոոպերատիվների ղեկավարներ լինել, նախատեսել ենք, որ բանկերի հետ Կառավարության համաֆինանսավորումը կարող է հասնել ընհուպ 70 տոկոսի և մեր պատկերացումն այն է, որ այն քաղաքացիները, ովքեր չեն կարողանա գնալ արտագնա աշխատանքի, նրանց գյուղատնտեսության ոլորտ ներգրավենք և ապահովենք այդ թվում պարենային անվտանգության հարցը»:
Սերգեյ Բագրատյանն արձագանքեց, թե բանկերն ասում են, որ դեռ ծրագիր չեն ստացել և մտավախություն հայտնեց, որ հնարավոր է ուշանանք:
«Ծառատունկը սկսվել է, մենք ոռոգման ջուր չենք տալիս գյուղացուն, ասում ենք ապրիլի 15-ից նոր կտանք»:
Բագրատյանի դիտարկումներին ի պատասխան վարչապետն ասաց.
«Պարոն Բագրատյան, այդպիսի բան մի ասեք, էսօր ոնց կարա գյուղացին ոռոգման ջուր ուզենա, ասենք գնա, ապրլին կգաս: Մարտ ամսին ոռոգման ջուրա մատակարարվել գյուղացիներին»:
Վարչապետը նաև ասաց.
«Իմ քաղաքական գործունեության ընթացքում ես հարյուրավոր գյուղեր եմ մտնել ու գրեթե առանց բացառության լսել եմ ջղայնացած խոսակցություն այն մասին, թե ինչպես գյոզալ կոլխոզները քանդեցին: Մենք էլ ասում ենք՝ Ստալինը, որ զենքի ուժով է այդ կոլխոզները ստեղծել, դուք էլ այդքան նոստալգիայով եք հիշում, մենք ձեզ հիմա հնարավորություն ենք տալիս, ասում ենք՝ ֆինանսավորում ենք տալիս, գնացեք կամավոր ստեղծեք»:
Ըստ վարչապետի՝ մեր գյուղատնտեսության ամենամեծ պրոբլեմը մեկն է՝ էֆեկտիվ չէ մեր գյուղտնտեսությունը:
