«Բարգավաճ Հայաստանը» դեմ է քվեարկելու 2020թ․ պետական բյուջեի նախագծին (տեսանյութ)

«Բարգավաճ Հայաստան» խմբակցությունը 2020թ․պետական բյուջեն չի համարում հեղափոխական։

Ըստ խմբակցության պատգամավոր Միքայել Մելքումյանի՝ այն տնտեսական հեղափոխությունը չսպասարկող բյուջե է։ Այս մասին խորհրդարանում հրավիրված ասուլիսին հայտարարեց նա՝ նշելով, որ խմբակցությունը դեմ է քվեարկելու 2020թ․ պետական բյուջեի նախագծին։

«2020թ․ պետական բյուջեն չենք համարում հեղափոխական։ Այն տնտեսական հեղափոխությունը չսպասարկող բյուջե է։ Այսինքն՝ այս բյուջեով այն ցուցանիշներին, որոնք քաղաքական հեղափոխության ընթացքում ժողովրդի և մեր բոլորի մոտ առաջացրել են դրական սպասումներ, չենք կարող հասնել: Դեռևս փետրվարին, Կառավարության հնգամյա ծրագրի հետ կապված, որին մենք դեմ էինք քվեարկել, ասել էինք, որ այս մոտեցումներով և ցուցանիշներով չենք կարող իրականացնել գրագետ քաղաքականություն և ապահովել այն սպասելիքները, որի մասին ես ասացի»,- նշեց Միքայել Մելքումյանը։

Ընդդիմադիր խմբակցության պատգամավորի համոզմամբ՝ համախառն ներքին արդյունքը 4,9 տոկոս է, մինչդեռ նախորդ տարիներին նվազագույն տոկոսը սահմանվում էր 5-7 տոկոս, ուստի այս ցուցանիշը կարելի է համարել հետնահանջ:

«Այն չի ապահովում բնակչության կենսամակարդակի, պաշտպանության մակարդակի համապատասխան երաշխիքների կատարումը»,- նկատեց պատգամավորը և հավելեց, որ անբավարար է համարում Կառավարության այն արձանագրումները, ըստ որի՝ թոշակները, ուսուցիչների աշխատավարձն այս կամ այն չափով պետք է բարձրանա:

«Այս տարի պետական ծախսերը, որը նախատեսված է եղել 220 մլրդ դրամ, հիմա` նոյեմբերի 1-ի դրությամբ, դրանից 89 մլրդ դրամն է ծախսվել, այսինքն՝ մոտավորապես 500 միլիոն դոլարից 150 դոլարն է ծախսվել: Իսկ մնացած գումարին տեղ չկա, Կառավարությունը չի կարող ծախսել: Այ քեզ բան, ես չհասկացա, այսինքն՝ մեզ գումար է անհրաժեշտ, վարկեր ենք ներգրավում, և այլն, հիմա փողը կա, պետք է մարդ գտնենք, որ ծախսե՞նք: Սրա բացատրությունն այն է, նախ՝ քաղաքական մակարդակով հնչել է, որ բոլոր տենդերները, որտեղ որ հիմնականում պետք է իրացվեն այս պետական ծախսերը, հիմնականում նույն ընկերություններն են, և նորերը չեն առաջանում, դրանց մի մասի վրա էլ քրեական գործեր է հարուցված»,- ընդգծեց Միքայել Մեքումյանը:

Տեսանյութը՝ քիչ անց։