Սիրիահայը հայաստանցի կնոջը համոզել է՝ որն է լավագույն խոհանոցը
Աջակցիր «Ա1+»-ին«Աշխատող մարդու համար միշտ էլ գործ կա: Ով ասում է, թե չկա, մեկ անգամ փորձելուց հետո հանձնվել է»:
Այսպես է կարծում սիրիահայ Հարություն Տեր-Բաղդասարյանը, որն արդեն 7 տարի է՝ ինչ ապրում և աշխատում է Հայաստանում: Վերնիսաժում զբաղվելով զարդերի մշակմամբ ու վաճառքով՝ նա կարողանում է գումար վաստակել և կենցաղի համար անհրաժեշտ պայմաններ ստեղծել:
Զարդերի պատրաստման աշխատանքներում նրան օգնում է հայրը: Նրանք փորձում են ստեղծել այնպիսի իրեր, որոնք շատ տարածված չեն, թեև ասում է, որ նույնության այս ժամանակաշրջանում շատ դժվար է դա իրականացնելը:
Այստեղ ամենաշատը կարոտում է սիրիական խոհանոցը։
«Հայկական խոհանոցը լավագույններից չէ: Նրանք, որոնք այդպես են կարծում, երբևէ չեն փորձել սիրիական ուտեստներ, և ես, վստահաբար, ասում եմ՝ աշխարհում լավագույնը Հալեպի խոհանոցն է: Նույնիսկ հայաստանցի կինս է դրանում համոզվել»,-ասում է նա։
Սիրիահայ Հակոբ Ազելյանը շատ լավ է սա հասկացել, ուստի Հայաստանում սիրիական խոհանոցի բացը լրացնելու համար վեց տարի առաջ հիմնեց «Դերյան» սիրիական խոհանոց-ռեստորանը: Նա նույնպես Հայաստան է եկել, երբ սկսվել է սիրիական պատերազմը: Ռեստորանի այցելուները թե սիրիացիներ են և թե տեղացիներ, և նրանք փորձում են համեղ ու հետաքրքիր մնալ պահանջկոտ հասարակության համար: Հաճախորդների նախընտրելի ուտեստներն են սիրիական հումուսն ու քեբաբի տեսակները:
Աշխատանքի հետ կապված դժվարություններ է ունեցել սկզբնական շրջանում, բայց կամքի շնորհիվ կարողացել է հաջողել իր գործում:
«Հայաստանը բնակվելու և աշխատելու համար թանկ երկիր է՝ Սիրիայի համեմատությամբ: Այստեղ արտադրություններ չկան, բոլորը վաճառում են»,-ասում է նա։
Այնուամենայնիվ՝ ուրախ է, որ դժվարություններից հետո կարողացել է ստեղծել մի ռեստորան, որը միշտ այցելուներ ունի։