Բացել լրահոսը Փակել լրահոսը
A A
Հասարակություն

Կոնդում բարձրահարկ շենքեր չպետք է լինեն

Երեւանում ավարտվեց  «Ճամփորդող կոնֆերանսը», որին մասնակցում էին գերմանացի, վրացի և հայ ճարտարապետներ ու փորձագետներ։  Քննարկումը  հիմնականում ծավալվեց  Կոնդի բարեկարգման շուրջ։ Նրանք այցելել են նաեւ Կոնդ։

Այսօր կոնֆերանսի վերջին օրն էր, եւ մասնակիցները ամփոփել են 4 –օրյա քննարկումները և ներկայացրել իրենց մոտեցումները՝ կարճաժամկետ և միջին լուծումներով: Մոտեցումները եղել են հինգը, քանի որ կոնֆերանսի մասնակիցները բաժանված են եղել 5 խմբի:

 «Բոլոր խմբերի մոտ հիմքը նույնն էր՝ այնտեղ ապրող մարդկանց կյանքի բարելավումը: Ոչ մի խումբ չէր պատկերացնում, որ  այնտեղ պիտի բարձրահարկ շենքեր լինեն»,- «Ա1+»-ի հետ զրույցում ասաց «Ճարտարապետական շաբաթ Երեւանի» ղեկավար  Տաթևիկ Զաքարյանը:

Ամփոփիչ կոնֆերանսին մասնակցել է նաև Կենտրոն վարչական շրջանի ղեկավար Վիկտոր Մնացականյանը: Տաթևիկ Զաքարյանը կարևորեց, որ փորձագետների մոտեցումը համընկել է Կառավարության մոտեցման հետ:

«Բոլորս համակարծիք էինք, որ առաջին հերթին պետք է հետազոտություն արվի  և միայն դրանից հետո առաջարկներ լինեն»,- եզրափակեց նա:

 Կոնֆերանսին ներկայացրած առաջարկներով  գերմանացի և վրացի փորձագետները պետք է զեկույց մշակեն, և ուղարկեն «Ճարտարապետական շաբաթ Երևանին», որն էլ իր հերթին կներկայացնի Երևանի քաղաքապետարանին:

Ի դեպ, գերմանացի ճարտարապետ Յոհան  Զիգմունդը նկատում է՝ Երևանը հրաշալի քաղաք է, շատ հետաքրքիր, բայց ամեն հարց լուծելիս՝   պետք է  հասկանալ  ի՞նչ են ուզում մարդիկ, որպեսզի. «Հասկանանք՝ ինչով կարող ենք մենք օգնել՝ ճարտարապետական, ճարտարագիտական մասով»։