Գյումրեցիները նախընտրում են «փորձվածները»
Աջակցիր «Ա1+»-ինՀանրապետությունում միս ներկրող կազմակերպությունները մի քանիսն են: Ներմուծվող մսի որակին հետեւում են սահմանային հսկիչ կետերում, որտեղ վերցվում են նմուշներ եւ ուղարկվում լաբորատորիա:
Փորձաքննության գոհացնող պատասխանից հետո նոր միայն թույլատրվում է միսը ներմուծել: Ներկրված միսը ընկերություններն օգտագործում էին տարբեր մսամթերքների պատրաստման համար, որոնք իրացվում էին ողջ հանրապետության տարածքում:
Շիրակի մարզում մսի ներմուծմամբ զբաղվող ընկերություն չկա, եւ միսը, արդեն մշակված տեսքով տեղի շուկա է հասնում մայրաքաղաքից: Խանութներում վաճառվող մսամթերքի որակի վերաբերյալ գյումրեցիներն ունեն տարբեր կարծիք: Ոմանք գոհ են մսի եւ մսամթերքի որակից, մյուսներն էլ նշեցին, որ գնումներ կատարում են ՙփորձված՚ վաճառակետից ու մսավաճառից: Իսկ շատերն էլ հայտնեցին, որ մսամթերքն անորակ է, եւ ընդհանրապես չեն գնում, ավելի շատ նախընտրում են թարմ միս գնել:
Շիրակի մարզի Անասնաբուժական կենտրոնում հավաստիացնում են, որ մարզի բոլոր վաճառակետերում մսամթերքի իրացման վերահսկողություն է սահմանված: ՙՍննդամթերքի անվտանգության եւ անասնաբուժության պետական տեսչության՚ պետ Անուշիկ Մնացականյանը, չբացառելով հատուկենտ դեպքերը, նշում է, որ տեղի շուկայում անորակ մսամթերք չի վաճառվում:
ՙԲողոքը խնդրում եմ գրավոր ներկայացնել մեր տեսչություն, մենք համապատասխան ստուգայց կկատարենք, որտեղից գնել են, համապատասխան լաբորատորիա կուղարկենք եւ կձեռնարկենք անհրաժեշտ միջոցառումներ՚, - նշում է տիկին Մնացականյանը:
Նա նաեւ մարզի բնակիչներին կոչ է անում՝ ցածրորակ մսամթերք գնելուց խուսափելու համար գնումներ կատարել այն վաճառակետերից, որտեղ առկա է անասնաբույժի համապատասխան կտրոնը՝ որակի եւ վաճառման թույլտվության վերաբերյալ:
Գյումրիի «Ցայգ» ՀԸ
