Բացել լրահոսը Փակել լրահոսը
A A

Ոչ մի արդյունավետ պարտիա

Սպորտ

Մեկօրյա ընդմիջումից հետո վերսկսվեց Լինարեսի շախմատային սուպերմրցաշարը, որի 5-րդ տուրում կայացած հանդիպումներից հետո մրցաշարային աղյուսակը որեւէ փոփոխություն չգրանցվեց: Լեւոն Արոնյանը այս տուրում սեւերով մրցում էր չինացի Վանգ Յուի հետ:

Արոնյանը հաղթանակի դեպքում միանձնյա առաջատար դառնալու լավ հնարավորություն էր ստանում, սակայն պարտիան ավարտվեց խաղաղ ելքով: Ոչ-ոքիներ գրանցվեցին նաեւ մյուս 3 հանդիպումներում: 5-րդ տուրից հետո մրցաշարային աղյուսակը 3.5-ական միավորով գլխավորում են Լեւոն Արոնյանը եւ Ալեքսանդր Գրիշչուկը: Աշխարհի չեմպիոն Վիշվանաթան Անանդը վաստակել է 3 միավոր:

Փաշիկյանը գլխավորում է աղյուսակը

Մոսկվայում ընթացող ՚Աերոֆլոտիՙ մրցաշարը թեւակոխել է վճռական փուլ: 8-րդ տուրում A1 խմբում ելույթ ունեցող Արման Փաշիկյանը սպիտակներով առավելության հասավ Ռուսաստանի ներկայացուցիչ Իգոր Կուրնոսովի նկատմամբ եւ 6 միավորով սկսեց գլխավորել մրցաշարային աղյուսակը:

Լավագույն տասնյակը 5 միավորով եզրափակում է Գաբրիել Սարգսյանը: Հայաստանի հավաքականի մեկ այլ խաղացող Տիգրան Պետրոսյանը 3.5 միավորով ընդամենը 49-րդն է:

A2 խմբում մրցաշարային աղյուսակը 6.5 միավորով գլխավորում է Մելիքսեթ Խաչիյանը: