Դատավորը վերանայեց իր որոշումը. «Սասնա ծռերի» նիստը քննվում է դռնբաց (տեսանյութ)
«Սասնա ծռեր» խմբի գործով դատավարությունն է շարունակվում Երևանի առաջին ատյանի ընդհանուր իրավասության դատարանում՝ դատավոր Մեսրոպ Մակյանի նախագահությամբ: Դատական նիստին ներկա է նաև ՊՊԾ գնդի գրավման ընթացքում զոհված Յուրի Տեփանոսյանի այրին: Նիստի սկզբում «Սասնա ծռեր» խմբի անդամ Արայիկ Խանդոյանի իրավահաջորդ տիկին Անուշ Խանդոյանի ներկայացուցիչ Արա Ղարագյոզյանը հանդես եկավ միջնորդությամբ, որպեսզի դռնփակ դատական նիստի վերաբերյալ որոշումը վերանայվի: Նա նշեց, որ ինքը և տիկին Խանդոյանը անհամաչափ են համարում դատական նիստը դռնփակ անցկացնելու դատարանի որոշումը: «Քրեական դատավարության օրենսգրքի 16-րդ հոդվածը չի նախատեսում մասնակի դռնփակ դատական նիստի անցկացում»,- ընդգծեց Ղարագյոզյանը: Հավելեց՝ նշելով, որ եթե որևէ քաղաքացի խախտել էր դատական նիստի ընթացքը, ապա պետք էր ուղղակի դատական նիստի դահլիճից հեռացնել տվյալ քաղաքացուն առանց սահմանափակելու այլ քաղաքացիների ներկա գտնվելու իրավունքը: Դատարանի այս որոշումը փաստաբանը որակեց որպես կամայական և նշեց, որ խախտվում է եվրոպական կոնվենցիայի 6-րդ հոդվածը՝ այսպիսի կարևոր գործերով և ապստամբության իրավունքի գործով: Մեղադրական կողմը, ի պատասխան այս հայտարարությանը, նշեց. «Թույլատրելով լրատվամիջոցներին ներկա գտնվելու դատական նիստին՝ ամբողջությամբ ապահովվում է մարդու իրավունքների հիմնարար ազատությունների պաշտպանության մասին եվրոպական կոնվենցիայով և ներպետական օրենսդրությամբ ամրագրված արդար դատաքննության հիմնական բաղադրատարրերից հանդիսացող հրապարակային դատաքննության իրականացումը»:
