Ես նարկոման չեմ. դատապարտյալ
«Արմավիր» ՔԿՀ դատապարտյալ Եղիշե Գեւորգյանը պատրաստ է ինքնասպանության հերթական փորձն անել, եթե չլուծվի դեղորայքի հարցը: Օգտվելով իր հեռախոսազանգի իրավունքից՝ նա «Ա1+»-ին հայտնեց, որ քրեակատարողական հիմնարկում չեն տրամադրվում հոգեմետ դեղերը, ինչը համարում է խոշտանգում իր նկատմամբ։ «Ես նարկոման չեմ, ես դրա կարիքն ունեմ»,- ասաց նա։ Իր նկատմամբ ուշադրություն գրավելու համար՝ նա նույնիսկ դեկտեմբերին ինքնասպանության երկու փորձ է արել, հացադուլ սկսել։ Նա 2-րդ խմբի հաշմանդամություն ունի եւ տեղաշարժվում է սայլակով։ ՔԿԾ Հանրային կապերի բաժնի պետ Նոնա Նավիկյանը «Ա1+»-ի հետ զրույցում ասաց, որ Եղիշե Գեւորգյանը ՔԿՀ բժիշկների հսկողության տակ է. «Եղիշե Գեւորգյանն իր հոգեմետ դեղերի ամբողջ կուրսը ստացել վերջացրել է: Այս պահին նա դրանք չի ստանում, քանի որ բժիշկների կողմից ցուցում չկա»: Իսկ Եղիշե Գեւորգյանը՝ պնդում է, որ ինքը այդ դեղորայքի անհրաժեշտությունը շատ ունի։