Հայաստանի 4 բռնցքամարտիկներ կպայքարեն Եվրոպայի մեդալների համար
Անապայում ընթացող բռնցքամարտի ավագ տարիքի պատանիների Եվրոպայի առաջնությունում ավարտվեցին 1/8 եզրափակիչ փուլի մենամարտերը: Հայաստանի բռնցքամարտիկներից այդ արգելքը հաղթահարեցին 4 հոգի՝ 50 կգ քաշային Ռուսլան Ասլիկյանը, 60 կգ քաշային Գոռ Կարապետյանը, 63 կգ քաշային Վահագն Մանուկյանը եւ 66 կգ քաշային Նարեկ Զախարյանը: Եւս մեկ հաղթանակի դեպքում նրանք նվազագույնը կապահովեն բրոնզե մեդալ: Իսկ ահա 70 կգ քաշային Գոռ Թովմասյանը, 75 կգ քաշային Հրանտ Թորոսյանը, 80 կգ քաշային Հենրիկ Ճղրիկյանն ու գերծանր քաշային Տիգրան Գեւորգյանը պարտվեցին իրենց մրցակիցներին եւ ավարտեցին ելույթները: Աղջիկների առաջնությունում 48 կգ քաշային Գայանե Տեր-Բարսեղյանն արդեն մտել է կիսաեզրափակիչ եւ իր համար ապահովագրել է մեդալ: Իսկ ահա 60 կգ քաշային Սոնա Հարությունյանը տանուլ տվեց մենամարտը ու դուրս մնաց պայքարից: Այսօր կկայանան քառորդ եզրափակիչ փուլի առաջին մրցամարտերը: Ռուսլան Ասլիկյանը կհանդիպի դանիացի Էլիաս Իդրիդի հետ: Գոռ Կարապետյանի մրցակիցը վրացի Գիորգի Գեգեչկորիան է: Վահագն Մանուկյանը ուժերը կչափի բուլղարացի Էմիրջան Մեհմեդիի, իսկ Նարեկ Զախարյանը՝ մոլդովացի Վլադիսլավ Գուձի հետ:
