10 կամ 20 դրամ՝ Սերժ Սարգսյանի թոշակի համար
«Մերժիր Սերժին» քաղաքացիական նախաձեռնությունը Սերժ Սարգսյանի թոշակի համար սկսում է դրամահավաք: Սակայն նվիրաբերության սահմանափակում կա՝ յուրաքանչյուր քաղաքացի կարող է նվիրաբերել 10 կամ 20 դրամ: Ապրիլի 9-ին լրանում է Սերժ Սարգսյանի պաշտոնավարման ժամկետը: «Մենք տրամադրված ենք, որ ինքը թոշակի է գնալու: Գիտնականների հանդիպման ժամանակ, երբ գիտնականները ասացին՝ իրենց փող է պետք, ինքն էլ հակադարձեց՝ իրեն էլ է փող պետք: Հիմա մենք հասկանում ենք, որ ինքը պատրաստվում է թոշակի գնալ եւ դրա համար իրեն անհրաժեշտ է գումար»,- «Ա1+»-ին ասաց «Մերժիր Սերժին» քաղաքացիական նախաձեռնության անդամ Դավիթ Սանասարյանը: Դրամահավաքը տեղի կունենա ապրիլի 5-ին եւ 6-ին՝ Կասկադում, Երիտասարդական մետրոյի շրջակայքում եւ 3-րդ մասում: 20 դրամ նվիրաբերելու դեպքում նվիրաբերության 50 տոկոսը տրվելու է Սերժ Սարգսյանի եղբորը՝ Ալեքսանդր Սարգսյանին: «Որպեսզի իրենց մեջ կռիվ չլինի եւ ավելորդ ժամանակ չկորցնեն: Միանգամից 50 տոկոսը իրեն կտանք»,- ավելացրեց Դավիթ Սանասարյանը: ՀՀԿ շատ գործիչներ Սերժ Սարգսյանին համարում է անփոխարինելի: Սակայն վարչապետի թեկնածուի անուն դեռ չի հրապարակվել:
