«Մեզ պետք չի էս պահին ոսկու պաշար». ԿԲ նախագահ (տեսանյութ)
Կենտրոնական բանկի նախագահ Արթուր Ջավադյանը խիստ զարմանում է, երբ լսում է, որ Հայաստանի բնակչության մեծ մասը ծայրահեղ աղքատ է. «Դուք ինչի՞ հետ եք համեմատում»: Արթուր Ջավադյանի Հայաստանի բնակչության վիճակը համեմատել է ԱՊՀ երկրների բնակչության տնտեսական վիճակի հետ եւ տեսել, որ մենք շատ լավ վիճակում ենք. «Ոչ Ռուսաստանը, ոչ Ղազախստանը, ոչ Բելառուսը, ոչ Կիրգիզիան, ոչ Ադրբեջանը մեզ հետ համադրելի չեն: Ոչ Մոլդովան, ոչ Ուկրաինան»: Այնքան լավ երկրից, ինչպիսին Հայաստանն է, արտագաղթելը նույնպես հասկանում է Կենտրոնական բանկի նախագահը՝ որտեղի՞ց չեն արտագաղթում. «Գնում են ավելի լավ ապրուստի տեղ, կարո՞ղ ա մարդիկ գնում են Կիրգիզստան»: Իսկ ահա հայաստանցի պաշտոնյաների հարստանալու մասին Կենտրոնական բանկի նախագահը լսում է առաջին անգամ. «Ես տենց բան չեմ տեսել, որ պաշտոնյաները հարստանում են Հայաստանի Հանրապետությունում»: Պարոն Ջավադյանն, ի դեպ, այսօր խոսել է նաեւ Հայաստանի ոսկու պաշարների բացակայության մասին՝ ամեն ինչ նորմալ է. «Մեզ պետք չի էս պահին ոսկու պաշար»: Նա հիշեցնում է, որ 14 տարի առաջ Հայաստանը հրաժարվեց 1,6 տոննա ոսկու պաշարից, սակայն շուտով կունենա անհամեմատ շատ. «Հիմա կառուցում ենք աֆինաժի գործարան ոսկու, բավականին լուրջ գործարան: 2004 թվին մեր ոսկու պաշարն ընդամենը եղել ա 1,6 տոննա, էդքան մեծ ոսկու պաշար չի եղել, ու էդ պահին դա ճիշտ հարց ա եղել էդ վաճառելը, որովհետեւ էն գումարը, որ փոխանցել ենք բյուջե, լուրջ գումար ա եղել»: Ի դեպ, պարոն Ջավադյանն այսօր ավետեց նաեւ, որ մեր սպառողական վարկերի տոկոսադրույքներն ավելի ցածր են, քան Ամերիկայի Միացյալ Նահանգներում: