Պահանջում են բերման ենթարկել Տիգրան Ուրիխանյանին (տեսանյութ)
ԱԺ պատգամավոր Տիգրան Ուրիխանյանն այսօր էլ չներկայացավ «Անալիտիկ» կայքի տնօրեն Անի Հովհաննիսյանի գործով դատական նիստին: Արդեն 4-րդ նիստն է՝ հենց գործով տուժող Տիգրան Ուրիխանյանի չներկայանալու պատճառով չի կայանում: «Հայաստանում ընթանում են Եվրոպայի խորհրդի աշխատանքային հանձնաժողովի աշխատանքները, եւ նրա ներկայությունը պարտադիր է»,- պարզաբանեց տուժողի ներկայացուվիչ Կարմեն Պողոսյանը: Տուժողի չներկայանալն առաջացրեց պաշտպանական կողմի դժգոհությունը. «Տուժողը իր նախորդ դատական նիստին դատարան ուղարկված գրությամբ հայտնել էր, որ պարտադիր կներկայանա այսօրվա դատական նիստին: Ամեն անգամ դատական նիստին մի պատճառաբանությո՞ւն բերել։ Ես առաջարկում եմ կամ բերման ենթարկելու որոշում կայացնել, կամ իմ պաշտպանյալի խափանման միջոցը փոխել, կամ նրա ցուցմունքները որպես ապացույց չճանաչել»,- ասաց Անի Հովհաննիսյանի պաշտպան Լիպարիտ Սիմոնյանը: Անի Հովհաննիսյանն էլ ավելացրեց. «9 ամիս տեւած նախաքննության ընթացքում Տիգրան Ուրիխանյանը ժամանակ չգտավ գալ առերեսման, հիմա ժամանակ չի գտնում գալ դատական նիստերին ներկայանա, բայց ժամանակ գտավ սուտ հաղորդում տալու: Ես միանում եմ պաշտպանիս, կարծում եմ իմ իրավունքների ոտնահարում է արդեն տեղի ունենում, ես կալանքի տակ եմ գտնվում ապօրինաբար: Կամ բերման ենթարկելու որոշում կայացրեք կամ իմ խափանման միջոցը փոխեք, թող ինքը մասնակցի իր կոնֆերանսներին եւ քննարկումներին»: «Անալիտիկ» կայքի տնօրեն Անի Հովհաննիսյանը մեղադրվում է ԱԺ պատգամավոր Տիգրան Ուրիխանյանից շորթում կատարելու մեջ: Ըստ մեղադրանքի՝ նա Տիգրան Ուրիխանյանից ամսական պահանջել է վճարել 300 հազար դրամ: Դատավոր Արշակ Վարդանյանը տեղեկացրեց, որ եթե հաջորդ դատական նիստին էլ Տիգրան Ուրիխանյանը չներկայանա, ապա նրա բերման ենթարկելու որոշում կկայացնեն եւ կքննարկվի նաեւ Անի Հովհաննիսյանի խափանման միջոցը փոխելու հարցը: «Եթե այսպես շարունակական է սա, եթե իրեն հարմարեցնենք նիստերը, վայրը ժամը, մի նիստը հասկանալի է, երկուսը հասկանալի է, բայց երրրորդը այլ բանի մասին է վկայում»,- նշեց դատավորը: Դատական նիստը կշարունակվի հունիսի 22-ին.
