Նախկին դատավորի 6 պաշտպաններից եւ ոչ մեկը չէր ներկայացել (տեսանյութ)
Նախկին դատավոր Իշխան Բարսեղյանի գործով դատական նիստին նրա 6 պաշտպաններից եւ ոչ մեկը չէր ներկայացել դատարան: Դատարան գրություն էր ուղարկվել, որ պաշտպան Վարդուհի էլբակյանը 10.05.2017 թ վիրահատվել է եւ ներկայումս բուժում է ստանում «Էրեբունի» բժշկական կենտրոնի լաբորասկոպիկ վիրաբուժության բաժնում: Իսկ պաշտպաններից Արա Ղազարյանը եւ Վլադիմիր Գրիգորյանը այլ զբաղվածության պատճառով չէին կարող ներկայանալ դատական նիստին: Կաշառք վերցնելու մեջ մեղադրվող Իշխան Բարսեղյանն արձագանքեց՝ նման պարագայում նիստը շարունակելու մասին խոսք լինել չի կարող. «Անհնար է դատական նիստի շարունակելը, մեկնաբանություններն ավելորդ են»: Դատական նիստին չներկայացած մյուս 3 պաշտպանների հարցը դատավոր Վաչե Մարգարյանը քննարկեց խորհրդակցական սենյակում: «Փաստաբաններ Լիանա Գրիգորյանին, Կարեն Հովհաննիսյանի, Կարեն Ղազարյանի նկատմամբ կիրառել դատական սանկցիա, այն է դիմել Փաստաբանների պալատ՝ վերջիններիս պատասխանատվության ենթարկելու համար»,- խորհրդակցական սենյակից վերադառնալուց հետո իր որոշումը հրապարակեց դատավորը: Դատական նիստը կշարունակվի մայիսի 20-ին: Նախորդ դատական նիստը հետաձգվել էր Իշխան Բարսեղյանի առողջական վիճակի պատճառով: Այսօր նա իրեն համեմատաբար լավ էր զգում: Բացի Իշխան Բարսեղյանից, այս գործով անցնում է նաեւ փաստաբան Էլզա Զաքարյանը: Վերջինս ընդունել է իր մեղքը, իսկ նախկին դատավորը՝ ոչ:
